Хүний амьдралыг гэр бүлтэй болохоос өмнөх, гэр бүлтэй болсны дараах үе гэж хоёр ангилдаг гэж зарим судлаачид ярьдаг. Үнэхээр ч хүний амьдралын хамгийн мартагдашгүй үе бол хурим байдаг. Тийм ч учраас хүн бүр хуримын ёслолоо хэзээ ч мартагдашгүй, хэнээс ч дутахгүй хийхийг хүсдэг билээ.

Гэвч хосуудын хувьд хуримын тов зарлагдсан үеэс л жинхэнэ асуудлууд эхэлдэг. Хуримын хувцасаа сонгохоос эхлээд урилгаа хэвлүүлэх, зочдоо хүлээн авах ресторан, хоолны цэс гээд олон олон асуудал ар араасаа цувран “толгойны өвчин” болдог.

Тэгвэл таны бизнес тэрхүү хосуудыг “толгойны өвчин”-өөс нь салгах явдал юм. Хосууд юунд ч санаа зоволтгүйгээр зөвхөн хуримын өдрөө хүлээх болно. Гадны орнуудад энэ бизнес маш хүчтэй хөгжсөн болохоор хэрвээ та энэ бизнесийг хийхээр шийдсэн бол тэднээс Монголынхоо орчин нөхцөлд тохируулаад “хуулахад” буруудах зүйлгүй. Энэ бизнесийг эхнээсээ маш сайн хийж чадвал танай компаниас захиалга салахгүй.

Энэ бол байнгын эрэлттэй байх бизнес. Хүн л байгаа хойно, хайрлаж дурлаж л байгаа цагт энэ бизнес хүрээгээ улам тэлэх болно. Хуримаа хийх гэж байгаа хосууд танд зөвхөн захиалгаа өгнө. Харин та болон танай багийнхан хуримын бүхий л бэлтгэл ажлыг зохион байгуулах болно. Олон сонголтыг хуримын эздэд санал болгох бөгөөд тэд сонгож та тэднийг сэтгэл амар байлган бүхнийг ёсчлон гүйцэтгэх юм.

Үүнд:
• Гэрлэх ёслолын ордны захиалга
• Хуримын хувцас
• Хуримын бөгж
• Зочдыг хүлээн авах ресторан
• Хуриманд явах машин
• Хуримын бүхий л гэрэл зураг
• Хуримын бичлэг
• Урилганы загварыг сонгон хэвлүүлэх
• Урлагийн номер гэх мэт

Шаардлагатай бол сүйт бүсгүйн гоо сайхан, биеийн галбирт ч санаа тавьж болно.

Энэ бол бизнесийн цоо шинэ орон зай. Танаас ихээхэн хүч хөдөлмөр, сэтгэл зүтгэл шаардана. Хариуд нь та санхүүгийн байдлаа бататгаад зогсохгүй, олон сайхан танилтай болж, ажил тань өөрөө ер бусын гэгээлэг орчин байх болно.

Илүү дэлгэрэнгүй мэдээлэл хэрэгтэй бол бид танд туслахад бэлэн байна.

Г.Жаргалмаа /Jargalmaa22@yahoo.com /