Цэцэрлэгийн цахим бүртгэл дуусахад ес хоног үлдээд байна. Эцэг эхчүүд энэ сарын 24-нийг дуустал https://tsetserleg.ulaanbaatar.mn/check.xhtml сайтад нийслэлийн цэцэрлэгүүдэд шинээр элсэн орж буй хоёр настай буюу 2015 оны хүүхдүүдийн регистерийн дугаарыг хийж бүртгүүлэх боломжтой.

Регистерийн дугаарыг нь хийхэд аль дүүргийн аль цэцэрлэгт хамрагдах тухай мэдээлэл гарч ирэх бөгөөд үүний дараа эцэг, эхчүүдийн гар утсанд бүртгэлийн тусгай дугаар ирэх аж.

Цахим бүртгэлийн системээр бүртгүүлэх боломжгүй хоёр настай хүүхдүүдийг наймдугаар сарын 10-ны өдрөөс эхлэн бүх цэцэрлэг дээр нэгдсэн журмаар багш ажилтнууд цахимаар бүртгэж байна.

Наймдугаар сарын 25-ны 10 цагт элсэлт авах хүүхдийн тоо хэтэрсэн цэцэрлэгүүд дээр санамсаргүй сонголтын аргаар онлайн сугалааг зохион байгуулна.

Бүртгүүлсэн хүүхэд бүрийн эцэг эхчүүдэд “Таны хүүхэд цэцэрлэгт хамрагдсан, хамрагдаагүй” гэсэн хариу мессеж бүртгэлтэй гар утасны дугаарт очих болно.

Цахим бүртгэлд 3-5 насны анги дэвшин орох хүүхдүүдийг цахимаар бус цэцэрлэг дээр нь наймдугаар сарын 21-23-ны өдрүүдэд ажлын цагаар бүртгэх юм.

Цахимаар бүртгэснээр цэцэрлэгийн хүүхэд элсүүлэх орон тоо болон бүртгүүлсэн хүүхдийн тоо нь  нээлттэй байх аж. Харин анги дүүргэлт хэтэрсэн бол сугалааны аргаар цахимаар  сонгон шалгаруулах юм байна.