Нисэхийн товчоо – Биокомбинат – Шувуун фабрик чиглэлийн 22.5 км авто замын өргөтгөл, шинэчлэлтийн ажил өнөөдрөөс эхэлж байна.

Хан-Уул дүүрэг, Төв аймгийн нутаг дэвсгэрт байрлах энэхүү 22.5 км урттай авто замыг улсын төсвийн хөрөнгө оруулалтаар өргөтгөх юм. Зам барилгын ажлын төсөвт өртөг 30.4 тэрбум төгрөг бөгөөд Нийслэлийн авто замын газраас хяналт тавьж ажиллах юм байна.

Энэ ажлын хүрээнд Бөхөгийн гол, Түргэний гол дээр 30 метр урттай 2 гүүр барих аж. Хоёр эгнээ, 9 метр өргөнтэй баригдах уг замыг “Тотал Инж” ХХК энэ оны 11 дүгээр сарын 01-нд улсын ашиглалтад хүлээлгэж өгөх гэрээ байгуулжээ.

Өргөтгөл, шинэчлэлтийн ажлын нээлтийн үеэр Нийслэлийн Засаг дарга бөгөөд Улаанбаатар хотын захирагч Э.Бат-Үүл “Төсөв мөнгөтэй холбоотой асуудлыг захиалагч тал бүрэн хариуцаж, ажиллах бололцоогоор хангаж өгөх үүрэгтэй. Харин замын компани замынхаа ажлыг сайн хийх ёстой.

2014 оны 8 сард ашиглалтад өгөх төлөвлөгөөтэй байсан энэ замыг нэг жилийн өмнө барьж дуусгана гэж амлалт өгөөд ажлаа эхэлж байгаа “Тотал Инж” компанийн замчдад нийслэлчүүдийн өмнөөс талархал илэрхийлж, амжилт хүсье. Нийслэлийн иргэдийн өмнө хүлээсэн хариуцлагаа ухамсарлаж, цаг хугацаанд нь чанартай зам барьж хүлээлгэж өгнө гэдэгт итгэж байна” гэлээ.

- Энэхүү замын 1-р хэсэг Нисэхийн Шалган бүртгэх товчооноос эхэлж Морингийн даваагаар даван Биокомбинатын хойгуур, “МТ” шатахуун түгээх станцийн урдуур гарч, Бөхөгийн гол, Түргэний гол дээр 30 у/м хоёр гүүр барьж, Шувуун фабрикийн баруун хойд айлууд хүртэлх 20.591 км;

- 2-р хэсэг нь 1-р хэсгийн замын 11.408 км-ээс эхэлж, Туул голыг хөндлөн гарч байгаа төмөр зам хүртэлх 2.22 км тус тус үргэлжлэх аж.

Х.Алтанзагас