УИХ-ын чуулганы өнөөдрийн хуралдаан үргэлжилж байна. Хуралдаанаар “Нийслэл Улаанбаатар хотын 2040 он хүртэлх хөгжлийн ерөнхий төлөвлөгөөг батлах тухай” Улсын Их Хурлын тогтоолын төслийг хэлэлцэж байна.

УИХ-ын гишүүн С.Эрдэнэбат “Болзошгүй гамшгийн үед хот хэрхэн бэлэн байх вэ гэдэгт ажлын хэсэг гарвал идэвхтэй оролцох хүсэлтэй байна. Хотыг төлөвлөхөд дарга дээрээс зөвшөөрдөг биш иргэд хаана байшин барих, зам байх тухайд оролцоотой байх ёстой.

Газ дэлбэрч, байшин сүйдсэн. Томоохон осол гарахаар хотоо буруутгаад, хэн нэгэн даргыг “дүүжлэх” биш аж ахуйн нэгжүүд аюултай ачаагаа хаагуур тээвэрлэх юм, хэдийд тээвэрлэх юм зэргийг тогтоох чухал. Үүнийг давхар төлөвлөлтдөө оруулах нь зөв.

Мөн зуслангийн газруудыг хэзээ өмчлүүлж, эзэмшүүлэх вэ гэдэг асуулт байна” гэв.

Үүнд Хотын дарга Х.Нямбаатар “Улаанбаатар хотод урьдчилан сэргийлэх, авран хамгаалах, аюул тохиолдоход Улаанбаатараас гарах гарцуудыг нэмэхээр байгаа. Одоогоор Улаанбаатар хот хэдхэн гарцтай. Зүүн, баруун тийш тус бүр нэг, урагш хойш хоёр гарц, өөр байхгүй. Тиймээс үүнийг нэмэх төлөвлөлтийг оруулж ирсэн.

Зуслангийн газрыг өмчлүүлэх шийдвэр одоогоор гараагүй байгаа. Эзэмших, ашиглах л боломжтой байгаа.

Аюултай ачаа тээвэрлэх зам Улаанбаатар хотод байхгүй. Улаанбаатар хот тэсэрч, дэлбэрэх бодисын нэг ч хэрэглээгүй хэр нь уул, уурхайн компани руу явах энэ төрлийн бодисууд бүгд Улаанбаатар хотод бууж байгаа. Цаашид эдгээр ачааг буулгах, тээвэрлэх, хотын гадуурх замын төлөвлөлтийг ч 2040 төлөвлөлтөд оруулж ирсэн” гэв.