Муслим шашны “Хаж” мөргөлийн баяр, “Ид аль-Адха” тахил өргөх баярууд энэ сарын дөрөвний өдрөөс эхлэн гурав хоногийн турш олон сая мөргөлчдийн хөл хөдөлгөөнд дарагдан байна.

Сарны тооллоос хамааран эдгээр баяруудыг тэмдэглэх тогтсон хугацаа байдаггүй бөгөөд энэ жилийн хувьд энэ сарын дөрөвнөөс еснийг хүртэл зургаа хоногийн турш үргэлжлэх юм.

Жил бүр Саудын Арабын Меккад зохион байгуулагддаг Мусульманчуудын амьддаа заавал очих ёстой ариун мөргөл хэмээн тооцогддог “Хаж” мөргөлийн баяр нь хууран мэхлэлтийг эсэргүүцэх бэлгэдэл болгож Сатаныг төлөөлүүлэн гурван чулуун хана босгож мөргөл үйлддэг Исламын томоохон баяруудын нэг юм.

Харин Курбан байрам буюу Ид аль-Адха хэмээх тахил өргөх баяр нь “Хаж” мөргөлийн баярыг залгуулан болдог бөгөөд энэ баяраар тусгайлан тэжээсэн нэг нас хэтрээгүй эрүүл амьтан байх агаад хонь, ямааг зөвхөн нэг хүн харин бух, үнээ, тэмээг долоон хүн хамтарч тахил өргөдөг байна. Ингэхдээ өглөө эртлэн босч биеэ ариутган угаал үйлдээд сүмд очин Такбир нэртэй дууг Аллахт зориулан дуулж дараагаар нь тахилаа өргөн, өөрсдөө зоог барьдаг байна. Үүнийхээ дараагаар хамаатан садныхаараа зочилдог уламжлалтай аж.

Энэ жилийн хувьд дэлхийн өнцөг булан бүрээс гурван сая гаруй Мусульманчууд Саудын Арабын Меккаг зорин ирж эдгээр ариун мөргөл, ёслолд оролцож байгаа аж.

Та бүхэн холбоотой мэдээнээс “Хаж” мөргөлийн баяр, “Ид аль-Адха” тахил өргөх баяруудын зургуудаас сонирхоно уу.

Р.Мишээл