"Imperial Gold Mining" компанийн нэрэмжит бөхчүүдийн дундах ширээний теннисний тэмцээн "Оч" клубт боллоо.

Тэмцээнд гавьяат тамирчин, улсын заан С.Хүрэлбаатар, улсын начин Д.Бадрах, Н.Баттулга, Г.Батбаатар, Да.Батбаяр, Б.Баянмөнх, Б.Даваа-Очир, жүдо бөхийн ДАШТ-ий мөнгөн медальт, гавьяат тамирчин Д.Амартүвшин, жүдо бөхийн ОУХМ Г.Хэрлэн, аймгийн хурц бадрангуй арслан А.Ганболд, аймгийн арслан Ч.Эрдэнэчулуун, Х.Мэндбаяр, М.Энхтайван нарын тэргүүтэй улс, аймаг, сумын цолтой 30 гаруй бөх өрсөлдөв. Тэмцээний аваргаар Хөвсгөл аймгийн Галт сумын харьяат, гавьяат тамирчин С.Хүрэлбаатар түрүүлж алтан медаль, цом, өргөмжлөл, нэг сая төгрөгийн эзэн боллоо. Дэд аваргаар Булган аймгийн Сайхан харьяат, аймгийн хурц бадрангуй арслан А.Ганболд тодорч, мөнгөн медаль, цом, өргөмжлөл, 700 мянган төгрөг гардав. Хүрэл медалийг Архангай аймгийн Батцэнгэл сумын харьяат, улсын начин Г.Батбаатар, Хэнтий аймгийн Биндэр сумын заан Т.Гүрдорж нар хүртэж цом, өргөмжлөл, 400 мянган төгрөгийн эзэн боллоо.

Хөвсгөл аймгийн Алаг-Эрдэнэ сумын харьяат, аймгийн арслан М. Энхтайван захиралтай “Imperial Gold Mining" компани цаашид жил бүр бөхчүүдийн дунд ширээний теннисний тэмцээний зохион байгуулахаар болсон байна.

Т.Түмэндэмбэрэл