АНУ-ын зэвсэгт хүчнээс Арабын тэнгист буй нисэх онгоц тээвэрлэгч хөлгийнх нь ойролцоо ирсэн Ираны нисгэгчгүй онгоц буюу дроныг устгасан гэж мэдэгдэв. 

АНУ-ын талд ямар нэг техник хэрэгсэл эвдрээгүй, цэргийн алба хаагчид бэртэж гэмтээгүй гэж мэдээлсэн байна.

Ираны дрон ямар зорилготой АНУ-ын хөлгийн ойролцоо очсон нь тодорхойгүй байна. Дрон ойртох үед АНУ-ын хөлөг Ираны эргээс ойролцоогоор 500 метрийн зайд байсан аж. 

Одоогоор Ираны талаас дроны асуудлаар ямар нэг тайлбар мэдээлэл өгөөгүй байна. 

Цагаан ордны хэвлэлийн төлөөлөгч энэ долоо хоногийн сүүлээр АНУ, Ираны төлөөлөгчид уулзах хэвээрээ байгааг мэдэгджээ. 

АНУ-ын ерөнхийлөгч Дональд Трамп Ираны талыг цөмийн хөтөлбөрийн асуудлаар хэлэлцээ хийхгүй бол цэргийн хүч ашиглана хэмээн сүрдүүлээд буй. 

Тэрбээр Ираны эрх баригчид хэлэлцээ хийх хүсэлтэй байгаа ч тэд цөмийн зэвсэггүй байх, жагсагчдын эсрэг хүч хэрэглэхгүй гэдгээ амлах ёстой гэсэн юм. 

Ираны дээд удирдагч нутаг дэвсгэрт нь халдвал бүс нутгийн дайныг өдөөх болно гэдгийг мэдэгдээд АНУ довтолбол хариу арга хэмжээ авна гэдгээ илэрхийлсэн. 

АНУ-д төвтэй хүний эрхийн байгууллага Иранд өрнөсөн эсэргүүцлийн жагсаалын үеэр 6800 гаруй хүн амиа алдсан гэж мэдээлсэн.

Харин Норвегид төвтэй Ираны хүний эрхийн байгууллага хохирогчдын тоо 25 мянгаас давсан байж болзошгүйг онцолсон байна.

Эх сурвалж: ВВС