Монголын Үйлдвэрчний Эвлэлийн Холбоо (МҮЭХ), Монголын Боловсрол, Шинжлэх Ухааны Үйлдвэрчний Эвлэлийн Холбоо (МБШУҮЭХ), Монголын Эрүүл Мэндийн Ажилтны Үйлдвэрчний Эвлэлийн Холбоо (МЭМАҮЭХ) хамтран хэвлэлийн хурал зохион байгууллаа.

Хэвлэлийн хурлаар:

• Боловсрол, эрүүл мэндийн салбарын ажилтнуудын тэмцэл хөдөлгөөний үр дүн, гарсан шийдвэр, тохиролцооны хэрэгжилт;
• Тэдгээр шийдвэр, тохиролцоог бодит ажил хэрэг болгох, хэрэгжилтийг хангахтай холбоотой асуудал,
• 2026 оны төсвийн тодотгол, 2027 оны төсөвт тусгах шаардлагатай асуудлуудын талаар үйлдвэрчний эвлэлийн байгууллагуудын санал, байр сууриа илэрхийллээ. 

Олон улсын хөдөлмөрийн байгууллагын 144-р конвенц, МУ-ын хөдөлмөрийн тухай хууль, үйлдвэрчний эвлэлийн эрхийн тухай хуультай холбоотойгоор хэлэлцээрийг энэ оны тавдугаар сард байгуулжээ.

Хэлэлцээрийн хүрээнд ойрын хоёр жилийн хугацаанд цалин хөлс, нийгмийн хамгаалалттай холбоотой тохиролцоог хийсэн байна.

Салбарын түвшинд байгуулагдсан хэлэлцээрийг хэрэгжүүлэхүйц хэмжээний төсвийг төсөвт тусгаагүйд асуудал гарч байгааг хэллээ.

Өнгөрсөн жил боловсрол, эрүүл мэндийн салбарт нийгмийг хамарсан өргөн хүрээний хөдөлгөөн тэмцэл гарсан. Улсын хэлэлцээрийг салбарын яамнууд Засгийн газарт өргөн мэдүүлэхээс өмнө салбарынхаа үйлдвэрчний эвлэлтэй зөвшилцөх ёстой. Уг зөвшилцлийг хангалттай хийхгүй байгааг МҮЭХ дурдав.

Өнгөрсөн жилийн ажил хаялт, тэмцэл хөдөлгөөний үр дүнд тодорхой тохиролцоог хийсэн. Боловсролын салбарын цалин хөлсийг 2026 оны нэгдүгээр сарын 1-нээс 50 хувь, 11-р сараас 25 хувь нийт 75 хувийг нэмэхээр тохирчээ.

Мөн эрүүл мэндийн салбарын цалин хөлсийг энэ оны нэгдүгээр сарын 1-нээс 30 хувь, наймдугаар сарын нэгнээс тухайн оныг дуустал сар бүр 9 хувь нэмэх хэлэлцээрийг хийсэн. Засгийн газар тухайн үед гарч болох бүх хохирлыг даах амлалтыг хүртэл өгчээ. Гэвч уг хэлэлцээр одоо хүртэл асуудал болсоор байгаа аж.  

Мөн гэрээ, хэлэлцээртээ хүрэхгүй, салбарын үйлдвэрчний эвлэлийн холбоотой хамтран ажиллаж, асуудлыг зөвшилцөхгүй бол тэмцэл хөдөлгөөн хийхэд бэлэн байгааг МҮЭХ мэдэгдлээ.