Нийслэлийн Засаг дарга Нямбаатар мэдээлэл өглөө. Тэрээр хэлэхдээ, хууль бус эзэмшилд байсан 15 барилга байгууламжийг нийслэлийн өмчид буцаан авч, 2025 оны нийслэлийн төсөвт ойролцоогоор 18 тэрбум төгрөгийн орлого төвлөрүүлсэн.

Ингэснээр нийслэлийн татварын бус орлого нэмэгдэж, уг эх үүсвэрээс нийгмийн салбарын хөтөлбөрүүд болон хөрөнгө оруулалтын ажлуудыг санхүүжүүлэх боломж бүрджээ.

Тухайлбал, улсын сургуулиудад хэрэгжүүлэх “1000 англи хэлний багш” хөтөлбөрийг энэ орлогын тодорхой хувиар санхүүжүүлэхээр төлөвлөсөн байна. Хөтөлбөрийн хүрээнд гадаадаас ирэх англи хэлний багш нарыг хөдөлмөрийн гэрээгээр ажиллуулж, цалин хөлсийг олгох бөгөөд байрны зардлын дутагдлыг төсвийн тодотголоор шийдвэрлэх аж.

Мөн нийслэлийн Өмчийн харилцааны газар жил бүр 10 гаруй тэрбум төгрөгийн нэмэлт орлого бүрдүүлэх чиглэлээр ажиллаж байгаа бөгөөд уг орлогын тодорхой хэсгийг англи хэлний багш нарын цалин, “Сүү” хөтөлбөрийн санхүүжилтэд зарцуулах боломжтой гэж үзэж байна.

Албаныхны зүгээс эдгээр зардлыг татвар нэмэгдүүлэхгүйгээр, татварын бус орлогоор бүрдүүлэх нь татвар төлөгчдөд дарамт учруулахгүй байх ач холбогдолтой гэв.