Цахим орчинд мал, мах болон тугалтай үнээ олноор нь зах зээлийн үнээс хямд үнээр зарна гэх хуурамч зар мэдээлэл байршуулж, иргэдийг залилсан этгээдийг Баянгол дүүргийн нутаг дэвсгэрээс баривчилжээ.

Уг этгээдийг залилангийн хэрэгт холбогдуулан эрэн сурвалжилж байсан бөгөөд мөрдөн шалгах ажиллагааны явцад иргэдэд нийт 600 сая гаруй төгрөгийн хохирол учруулсан нь тогтоогдсон байна.

Түүнд холбогдох хэргийг үргэлжлүүлэн шалгаж байгаа бөгөөд Дүүргийн эрүү, иргэний хэргийн хялбар ажиллагааны анхан шатны тойргийн шүүхийн захирамжаар цагдан хорих таслан сэргийлэх арга хэмжээ авчээ.

Иймд иргэд цахим орчинд байршуулсан хэт хямд үнэтэй бараа бүтээгдэхүүний зар мэдээлэлд болгоомжтой хандаж, аливаа худалдан авалтын урьдчилгаа төлбөр шилжүүлэхээсээ өмнө мэдээллийн үнэн зөвийг сайтар нягталж байхыг Цагдаагийн ерөнхий газраас анхаарууллаа.

Эх сурвалж: ЦЕГ