Бэлчээрийн мал аж ахуй эрхлэгчдийн олон улсын жилийн хүрээнд “Бэлчээрийн мал аж ахуйн тогтолцоон дахь малчдын залгамж халаа: Асуудал, шийдэл” сэдэвт олон улсын эрдэм шинжилгээ, үйлдвэрлэлийн бага хурал өнөөдөр эхэллээ.

Хоёр өдөр үргэлжлэх тус хурлаар малчдын залгамж халааны өнөөгийн нөхцөл байдал, тулгамдсан асуудлыг хэлэлцэж, шинжлэх ухаан, бодлого, үйлдвэрлэлийн уялдаанд тулгуурлан боломжит шийдлүүдийг тодорхойлох юм. Мөн улс орон, бүс нутгийн сайн туршлагыг хуваалцаж, бодлогын болон практик зөвлөмж боловсруулах зорилготой.

Хурлыг ХХААХҮЯ, ХААИС, НҮБ-ын Хүнс, хөдөө аж ахуйн байгууллага болон дотоод, гадаадын бусад байгууллага хамтран зохион байгуулж байна.

Нээлтийн үеэр ХХААХҮЯ-ны Төрийн нарийн бичгийн дарга Т.Жамбалцэрэн малчдын залгамж халааг зөвхөн залуу малчдын тоогоор хэмжихээс илүүтэй малчин өрхийн амьжиргаа, нийгмийн баталгаа, бэлчээрийн ашиглалт, хөрсний чанар зэрэг асуудлыг цогцоор нь шийдвэрлэх шаардлагатайг онцолжээ.

Тэрбээр мөн малчдын олон улсын жилийн хүрээнд зохион байгуулж буй хурал, зөвлөгөөнөөс гарсан шийдвэр, зөвлөмжийг бодит төсөл, хөтөлбөрөөр хэрэгжүүлэх, эрдэм шинжилгээ, судалгааны байгууллагуудын оролцоог нэмэгдүүлэх шаардлагатайг хэлсэн байна.

Хурлын үндсэн хуралдаанаар малчдын залгамж халааг хангах төрийн бодлого, эрх зүйн орчин, Монголын малчдын өнөөгийн байдал, чиг хандлага, мөн БНХАУ, БНКУ-ын туршлага болон малын генетик нөөцийн асуудлыг хэлэлцэж байна.

Маргааш эрдэмтэн судлаачид, малчдын оролцоотой “Бэлчээрийн мал аж ахуй эрхлэх уламжлал, шинэчлэл” сэдэвт нээлттэй хэлэлцүүлэг зохион байгуулах юм.

Эх сурвалж: Хүнс, хөдөө, аж ахуй, хөнгөн үйлдвэрийн яам