Монгол Улсын ЦЕГ, БНТУ-ын ДЯЯ-ны хооронд хамтран ажиллах тухай Хэлэлцээрийг 1997 онд байгуулснаар манай хоёр орны цагдаа, хууль хяналтын холбогдох байгууллагуудын хамтын ажиллагаа идэвхижсэн байна.

Хоёр орны цагдаагийн байгууллагын хамтын ажиллагааны хүрээнд монголын цагдааг өндөр боловсролтой боловсон хүчнээр хангах асуудал голлох байр суурь эзэлж ирсэн ба Туркийн тал урт болон богино хугацааны сургалтуудад манай алба хаагчдыг хамруулахад Туркийн Элчин сайдын яам, Туркийн Олон улсын хамтын ажиллагааны нийгэмлэг - ТИКА, БНТУ-ын ДЯЯ-ны харьяа Мансууруулах бодис, зохион байгуулалттай гэмт хэрэгтэй тэмцэх олон улсын академи - ТАДОК зэрэг холбогдох байгууллагууд онцгой үүрэг гүйцэтгэж иржээ.

БН Турк Улсын Цагдаагийн Академи нь манай улсын цагдаагийн байгууллагын боловсон хүчний бодлогод онцгой байр суурь эзэлдэг бөгөөд Монголын цагдаагийн боловсон хүчнийг өөрийн оронд бэлтгэн оюуны том хөрөнгө оруулалтийг хийхийн зэрэгцээ Монголын цагдаагийн байгууллагыг орчин үеийн гэмт хэргийн төрөл болон цагдаагийн үйл ажиллагааны талаар өргөн мэдлэгтэй, чадварлаг хүмүүсээр бэхжүүлэхэд их тус нэмэр болдог байна.

Өнгөрсөн 2008 онд манай хоёр орны цагдаагийн байгууллага хоорондын хамтын ажиллагаа өргөжиж ЦЕГ-ын Дотоодын цэрэг, БНТУ-ын жандармерийн хооронд харилцаа холбоо тогтоож Туркийн талаас энэ онд сургалт зохион байгуулахаар төлөвлөж байгаа аж.

2009 оноос эхлэн Монголын цагдаагийн байгууллага ТИКА-тай хамтран “Хамтын ажиллагааны сургалтын төсөл” –ийг хэрэгжүүлэхээр ажиллаж байна.

Тусгай хэрэгслийг хүлээлгэн өгөх ёслолын арга хэмжээнд БНТУ-аас Монгол Улсад суугаа Элчин сайд, ноён Асим Арар, хоёрдугаар нарийн бичгийн дарга Умут Дениз, Туркийн олон улсын хамтын ажиллагааны байгууллага /ТИКА/-ын хөтөлбөр зохицуулагчийн туслах Хусейн Эргэзэн нар оролцож байна.

Монгол Улс Бүгд Найрамдах Турк Улсын хооронд дипломат харилцаа тогтоосны 40 жил энэ ойн босгон дээр тохиож буйгаараа энэхүү арга хэмжээ онцлог юм.