УИХ-ын гишүүн Б.Уянга, Б.Мөнхсоёл, Б.Жаргалан нар Байгалийн нөөц ашиглалтын ил тод байдлын тухай хуулийн төслийг өргөн мэдүүллээ.

Хуулийн төсөлд эрдэс баялаг, ус, ой, амьтан, ургамлын нөөц ашиглалттай холбоотой мэдээлэл, тайланг нэгтгэн ил тод болгох нэгдсэн цахим портал бий болгохоор тусгажээ. Уг портал нь байгалийн нөөц ашиглалтын тайлан, мэдээллийг цахимаар хүлээн авах, бүртгэх, хадгалах, боловсруулах, шалгах, нийтлэх, мэдээлэл солилцох зориулалттай байх бөгөөд зөвшөөрөл, гэрээ, төлбөр, татвар, орлого, эцсийн өмчлөгч болон байгаль орчны нөлөөллийн мэдээллийг олон нийтэд хүртээмжтэй болгох юм байна.

Мөн байгалийн нөөц ашигласны төлбөр, татвар, төрийн болон орон нутгийн өмчит этгээдэд төлсөн төлбөр, ногдол ашиг, хандив, тусламж, дэмжлэгийн мэдээллийг байгууллагын нууцад хамааруулахгүй байхаар тусгажээ. Гэрээ, хэлэлцээр болон тэдгээрийн нэмэлт, өөрчлөлтийг нэгдсэн порталд бүтнээр нь ил тод байршуулах зохицуулалт багтсан байна.

Таван бүлэг, 22 зүйлтэй хуулийн төслийг дагалдуулан нийт 17 хуульд нэмэлт, өөрчлөлт оруулахаар боловсруулжээ.

Хуулийн төсөл батлагдсанаар байгалийн нөөц ашиглалтын мэдээлэл нэг эх сурвалжид төвлөрч, иргэдийн мэдэх эрх, олон нийтийн хяналт, орон нутгийн оролцоог нэмэгдүүлэхэд чиглэнэ гэж төсөл санаачлагчид үзэж байна.