Камерун улсын ерөнхийлөгч Паул Бияа Үндсэн хуульд өөрчлөлт оруулж, 43 жилийн засаглалынхаа түүхэнд анх удаа дэд ерөнхийлөгчтэй болох гэж байна. 

Тэрбээр өдгөө 93 настай бөгөөд дэлхийн удирдагч нараас хамгийн өндөр настай төрийн тэргүүн нь юм.  

Ингэснээр түүнд ямар нэг зүйл тохиолдвол дэд ерөнхийлөгч нь шууд албан тушаалыг нь залгамжилж, дараагийн сонгууль хүртэл бүрэн эрхийг нь дуусгах зохицуулалттай болж байна. 

Шинэ өөрчлөлтөөр дэд ерөнхийлөгчийг ерөнхийлөгч өөрөө томилно.

Камерун улс дэд ерөнхийлөгчийн албан тушаалыг 1972 онд хүчингүй болгосон бөгөөд сүүлийн жилүүдэд ерөнхийлөгчийн үүргийг Сенатын дарга нь түр орлон гүйцэтгэдэг болсон. 

Ерөнхийлөгчийн эрүүл мэндийн байдалтай холбоотой яриа байнга гардаг ч нийтэд ил тод хэлэлцэх нь бараг хориотой сэдэв хэвээр байгаа юм. 

Бямба гарагт парламентын хоёр танхимын хамтарсан хуралдаанаар Үндсэн хуульд өөрчлөлт оруулах хуулийн төслийг 200 гишүүн дэмжжээ. 

Одоо уг хуулийг ерөнхийлөгч гарын үсэг зурж баталгаажуулах шаардлагатай аж.

Дэмжигчид энэхүү өөрчлөлт нь засгийн газрын үйл ажиллагааны үр ашгийг нэмэгдүүлнэ гэж үзэж байна. 

Өнгөрсөн аравдугаар сард болсон сонгуулиар Бияa 53.7 хувийн санал авч найм дахь удаагаа ялалт байгуулсан ч сөрөг хүчин уг сонгуулийг луйврын шинжтэй болсон гэж үзсэн.

Эх сурвалж: ВВС