Нэгдсэн Үндэстний Байгууллагын Ерөнхий Ассамблей 2022 онд баталсан шийдвэрийн дагуу жил бүрийн 3 дугаар сарын 30-ны өдрийг “Олон улсын тэг хог хаягдлын өдөр” болгон тэмдэглэж, тогтвортой хэрэглээ, үйлдвэрлэлийг дэмжих, хог хаягдлыг бууруулах дэлхийн хүчин чармайлтыг уриалж байна.

Энэхүү өдрийг Нэгдсэн Үндэстний Байгууллагын Байгаль орчны хөтөлбөр болон НҮБ-ын Хүн амын нутагшил, суурьшлын хөтөлбөр хамтран зохион байгуулдаг бөгөөд 2026 онд “хүнсний хаягдал” сэдвийг онцлон, байгаль орчны бохирдолтой уялдах асуудлыг хөндөн авч байна.

Монгол Улсад ““Хоол хүнсний хаягдалгүй болохын төлөө хотуудын үйл ажиллагаа болон олон улсын хамтын ажиллагааг идэвхжүүлэх нь” сэдэвт цахим хэлэлцүүлгийг Базелийн конвенцын Ази, Номхон далайн бүсийн төв, Монгол Улсын Байгаль орчин, уур амьсгалын өөрчлөлтийн яам, Нэгдсэн Үндэсний байгууллагын холбогдох байгууллагуудтай хамтран зохион байгуулж байна.

Энэ хүрээнд Байгаль орчин, уур амьсгалын өөрчлөлтийн яамнаас тус арга хэмжээг онцгойлон дэмжиж, тэг хог хаягдлын бодлого, эрх зүйн орчны талаарх мэдээллийг түгээхэд анхаарч ажиллаж байна. Тус арга хэмжээнд Улаанбаатар хотын Захирагчийн ажлын алба, нийслэлийн 9 дүүрэг, Эрдэнэт, Дархан, Хархорин хотууд болон Завхан, Хөвсгөл, Хэнтий, Төв, Булган, Өвөрхангай, Дорнод, Говьсүмбэр, Увс аймгуудын төлөөлөл бүхий 100 гаруй оролцогч танхимаар болон цахимаар оролцож байна.

Арга хэмжээ нь Монгол Улс дах Нэгдсэн Үндэсний Байгууллагын байранд зохион байгуулагдаж, Монгол Улсад суугаа НҮБ-ын Суурин зохицуулагч ноён Яап ван Хиердэн болон БОУАӨЯ-ны Төрийн нарийн бичгийн дарга Ш.Батбаяр нар оролцогчдыг хүлээн авч, тэг хог хаягдлын чиглэлд хамтын ажиллагааг бэхжүүлэх, бодит үйл ажиллагааг эрчимжүүлэхийн ач холбогдлыг онцлон тэмдэглэлээ.

Энэхүү арга хэмжээ нь сайн туршлага солилцох, хамтын ажиллагааг өргөжүүлэх, тогтвортой хөгжлийн зорилтуудыг хэрэгжүүлэхэд чухал хувь нэмэр оруулж байна.

Эх сурвалж: Байгаль орчин, уур амьсгалын өөрчлөлтийн яам