Шатахууны үнийн өсөлтийг дагаад Нийтийн тээврийн үйлчилгээний үнэ нэмэгдээд байгаа. Уг асуудлын талаар уржигдар Засгийн газар хуралдсан юм. Энэ тухай Нийслэлийн нийтийн тээврийн газрын Гадаад харилцааны мэргэжилтэн Д.Болортуяатай уулзаж, зарим зүйлийг тодрууллаа.

-Нийтийн тээврийн үйлчилгээний үнийн талаар Засгийн газар хоёр хоногийн өмнө хуралдлаа. Энэ хуралдаанаас тодорхой шийд гарсан уу?
-Энэ асуудлаар наадам өнгөрөөгөөд дахин хуралдана. Нийслэлийн нийтийн тээврийн үйлчилгээний үнийг шатахууны үнийн өөрчлөлттэй уялдуулан хууль тогтоомжийн хүрээнд шинэчлэн тогтоох талаар Засгийн газар цаашид холбогдох арга хэмжээ авахыг хотын даргад үүрэг болгосон байгаа. Мөн үнийн өөрчлөлтөөс шалтгаалан төлбөргүй зорчдог иргэдийн нөхөн олговорт нэмж шаардах хөрөнгийг төсөвт тусган санхүүжүүлэх болсон.

-Нөхөн олговорт төрөөс хэдий хэмжээний төгрөг гаргадаг вэ?
-Ер нь нийт зорчигчийн 56 хувь нь л төлбөр төлдөг. Үлдсэн 44 хувь нь холбогдох хуулийн хүрээнд үнэ төлбөргүй зорчдог. Эдгээр 160 гаруй мянган иргэдийн тээврийн зардалд төсвөөс өнгөрсөн онд 26.8 тэрбум төгрөг өгсөн бол энэ оны байдлаар 30.4 тэрбум төгрөг олгохоор болсон.

-Нийтийн тээврийн газраас үнэ нэмэхгүй байх боломж бий юу. Энэ талаар судалж үзсэн үү?
-Нийтийн тээврийн үйлчилгээ эрхлэгч байгууллагууд өдөрт 600 мянган зорчигч тээвэрлэдэг. Нэг зорчигч тутмаас 26187 төгрөгийн алдагдал хүлээдэг. Харин дизель түлшний үнэ энэ оны хоёрдугаар сард 9.1 хувиар нэмэгдэн 1440 төгрөг болсноос тээврийн байгууллагууд сар тутам 240 сая төгрөг, жилдээ 2.8 тэрбум төгрөгийн алдагдал хүлээх тооцоо гараад байна. Тиймээс үнэ нэмэхгүй байх боломж бага гэсэн үг л дээ.

-Автобусны үнэ цаашид хэрхэн өөрчлөгдөх бол?
-Энэ талаар сайн хэлж мэдэхгүй юм. Засгийн газрын хуралдаанаар уржигдар л эхэлж хэлэлцэгдлээ. Баяр наадам дөхсөн учраас ойрд шийдэгдэхгүй байх аа.

С.Өлзий