Монголын үндэсний музейд “Нүүдэлчдийн аяга” тусгай үзэсгэлэн нээлээ. Үзэсгэлэнд хүрлийн үед холбогдох чулуун аяганаас эхлэн XX зууны эхэнд хэрэглэж байсан тахилын ширээний мөнгөн сийлбэртэй аяга зэргийг дэлгэжээ.

Мөн XX зууны эхэнд холбогдох, хүний гавлын ясаар хийсэн маанийн үсэгтэй аяга, аяганы эсгий гэр зэргийг дэлгэсэн байна. Аяганы эсгий гэрийг одоо үеийнхээр зүйрлэвэл хоол ундны халуун савыг санагдуулам.

Нүүдэлчдийн ур ухаан, эд хэрэгслийн загвар хэрхэн өөрчлөгдөж ирснийг үзэсгэлэнд дэлгэсэн олон төрлийн мөнгөн аяганы хийц ажиллагаанаас харж болно.

1946 онд Маршал Х.Чойбалсанд дурсгасан мөнгөн аягыг, ууттай нь онцолж дэглэжээ. Эл аяганы бөөрийг товойлгосон нэгэн ижил хэмжээтэй 24 бад хээ, 12 жил, завсар хооронд монгол бичгээр “Зургаа дугаар хорооны ардуудаас Улсын шалгарсан баатар маршал Чойбалсангийн 50 насны ойд дурсгав” хэмээн товойлгон бичжээ.

Үзэсгэлэнг угтан “Нүүдэлчдийн аяга” нээлттэй эрдэм шинжилгээний хурлыг өнгөрсөн сарын 22-ны өдөр зохион байгуулжээ. Хуралд Монголын үндэсний музей, ШУА-ийн Археологийн хүрээлэн, Чингис хаан Үндэсний музей, Олон улсын музейн зөвлөлийн Үндэсний хороо, Соёл Урлагийн Их сургууль зэрэг байгууллагуудын арав гаруй судлаач, эрдэмтэд нүүдэлчдийн аяганы хэлбэр, хийц, урлал, нэр, бэлгэдэл, хэрэглээ, хадгалалт хамгаалалт зэрэг сэдвийн хүрээнд илтгэл хэлэлцүүлсэн аж.

Ирэх сарын 20-ны өдрийг хүртэл үзэсгэлэнг нийтийн хүртээл болгох ажээ.

Гэрэл зургийг Т.Бархас