Тавантолгойн хэлэлцээрийн явцын талаар Монгол Улсын сайд М.Энхсайхан мэдээлэл хийлээ. "Энержи ресурс”-ын хамтарсан консерциум, Хятадын “Шинхуа энержи”, Японы “Сүмитомо” корпораци Тавантолгойд хөрөнгө оруулагчаар шалгарсан.

Хөрөнгө оруулагчид энэ долоо хоногт хоёр дахь удаагаа хамгийн өргөн бүрэлдэхүүнээр хуралдаж,  чухал хэлэлцээрүүдийг хийх гэж байна. Хэлэлцээрт манай талаас Монгол Улсын сайд М.Энхсайхан тэргүүтэй Уул уурхайн яам, Гадаад харилцааны яам, Хууль зүйн яам, Зам тээврийн яам болон Хөрөнгө оруулалтын газрын төлөөлөгч зэрэг 30 гаруй хүний бүрэлдэхүүнтэй Ажлын хэсэг байгуулагджээ.

30 жилийн хугацаанд хэрэгжих энэ том төслийн 30 хувийг хөрөнгө оруулагчид өөрийн хөрөнгөөр, 70 хувийг олон улсын банк, санхүүгийн байгууллагаас хөрөнгө босгон зээлээр санхүүжүүлэх юм байна. Хөрөнгө оруулагчид энэ төсөл хамгийн гол нь тогтвортой, амжилттай хэрэгжих ёстой гэж байгаа тухай Монгол Улсын сайд онцлов.

Зээл авахын тулд хөрөнгө оруулагчид хамтран олон улсын банк, санхүүгийн байгууллагын шаардлага хангасан бичиг баримт бүрдүүлэх шаардлагатай бөгөөд энэ талд санаачилга гарган ажиллаж буй аж.

“Тавантолгойн төслийн хэлэлцээрийн явц 50 хувьтай байна. Төсөл амжилттай хэрэгжвэл зарцуулалтын зардал, хөрөнгө мөнгө босгох үнийн дүн нь хамгийн багаар бодоход 94 тэрбум ам.доллартай тэнцэнэ.

Хөрөнгө оруулалтын нэг гэрээнд нь 80 орчим асуудал багтаж байна. Хөрөнгө оруулагчид харилцан ашигтай, нээлттэй, бүтээлч хэлбэрээр хамтран ажиллаж байна. Зөвхөн уул уурхайн олборлолт явуулах биш, нэмүү өртөг шингэсэн бүтээгдэхүүн үйлдвэрлэх чиглэлд гэрээнд тодорхой заалтууд тусгалаа олно” гэж Монгол Улсын сайд М.Энхсайхан товч мэдээлэв. Хэлэлцээрт  талуулд тэгш эрхтэй оролцож байгаа хэмээлээ.