“Аристотель ба орчин үеийн философи сэтгэлгээ” эрдэм шинжилгээний бага хурал болно.

Дэлхийн философийн өдрийг тохиолдуулан, Аристотелийн мэндэлсний 2400 жилийн ойд зориулан энэ хурлыг хийж байна. ЮНЕСКО-гийн Монголын Үндэсний Комисс, ШУА-ийн Философийн хүрээлэн, МУИС-ийн Философийн тэнхим хамтран өнөөдөр дээрх хурлыг зохион байгуулна.

Хурал ШУА-ийн Тэргүүлэгчдийн газрын гурван давхрын хурлын танхимд 09.00 цагт эхэлжээ. Энэ хурлын зорилго нь хүн төрөлхтний сэтгэлгээний түүхэнд Аристотелийн оруулсан хувь нэмэр, түүний философийн сургаалиуд, ач холбогдлыг олон нийтэд сурталчлах, философийн түүхийн судалгааг хөгжүүлэхэд чиглэжээ.

“Аристотелийн ёс суртахуун-улс төрийн философи” үндсэн илтгэлийг нэрт философич, шинжлэх ухааны гавьяат ажилтан, доктор, профессор Б.Даш-Ёндон тавих юм. Тэрээр дэлхийн сонгодог эх сурвалж болох Аристотелийн бүтээлийг грек хэлнээс эх хэлэндээ орчуулж, дэлхийн философийн түүхийн судалгааг эргэлтэд оруулахад жинтэй хувь нэмэр оруулсан.

Мөн сүүлийн жилүүдэд “Монголын хөгжлийн философи” суурь судалгааны ажил эрхэлж байгаа юм. Хурлын үеэр Аристотелийн бусад ухагдахуунуудаар есөн хавсралт илтгэл тавина. Тухайлбал

• Сайн үйлийн тухай Аристотелийн үзэл ба орчин үе,
• “Метафизик” хэмээх ойлголтын тухай асуудал,
• Логикийн шинжлэх ухааны хөгжилд Аристотелийн гүйцэтгэсэн үүрэг,
• Аналитик хэмээх нэр томьёоны тухайд,
• Аристотелийн “Никомахын ёс зүй” зохиол дахь ёс суртахууны зарим асуудал,
• Аристотелийн философи дахь хүмүүжлийн тухай ойлголт,
• Аристотелийн философи дахь улс төрийн асуудлаас,
• Аристотелийн гоо зүйн үзэл ба орчин үе, Аристотелийн боловсролын талаарх үзэл баримтлал гэсэн илтгэлүүд тавина.

Хурал 14.00 цаг хүртэл үргэлжлэх юм.