Тайвань БНХАУ-тай нэгдэх зайлшгүй шаардлагатай тухай тус улсын дарга Ши Жиньпин хоёр тал дайсагналаа зогсоосон 40 жилийн ойн арга хэмжээний үеэр мэдэгдлээ.

БНХАУ 1979 оны нэгдүгээр сарын 1-ний өдөр Тайваний арлууд руу бөмбөгдөхөө зогсоож, Тайвань дахь ард иргэдээ эргэн нэгтгэх тухай захидал илгээж байсан түүхтэй.

Хэдийгээр Тайвань тусдаа засаг захиргаатай, дэ факто буюу биеэ даасан хэдий ч хэзээ ч эх газраас албан ёсоор тусгаар тогтнолоо зарлаж байгаагүй юм.

Ши Жиньпин тус арга хэмжээний үеэр үг хэлэхдээ “Тайваний ард иргэд тусгаар тогтнол зөвхөн бэрхшээл авчирна гэдгийг ойлгох ёстой. Мөн Бээжин Тайваний салан тусгаарлах үзлийг дэмжсэн аливаа нэгэн үйл ажиллагааг хүлээн зөвшөөрөхгүй” гэжээ. Үүний оронд яриа хэлэлцээ болон тайван замаар нэгдэх нь бид бүгдийн ашиг сонирхолд нийцнэ гэв.

Мөн Ши Жиньпин “Бид нэг гэр бүлээс гаралтай. БНХАУ болон Тайваний харилцаа нь Хятадын дотоодын асуудал тул гадаад улс орнууд хөндлөнгөөс оролцохыг тэвчиж чадахгүй” гэдгийг онцлон тэмдэглэжээ.

Хэрэв хоёр талын тайван замаар нэгдэх үйл ажиллагаанд гадаад улс орнууд хөндлөнгөөс оролцвол шаардлагатай арга хэмжээ авна гэдгийг Бээжингийн талаас мэдэгдэв.

Харин Тайваний ерөнхийлөгч Цай Ин Вэн “Бээжин 23 сая хүний эрх чөлөө, ардчилал төдийгүй Тайваний оршин байгааг хүлээн зөвшөөрөх хэрэгтэй" хэмээн үзэж байгаа юм.

Эх сурвалж: BBC