Сүхбаатар дүүргийн нэгдүгээр хороонд, Сэнтрал парк оффисын нэгдүгээр давхарт байрлах Segafredo Zanetti Espresso нь нийтийн эзэмшлийн зам, талбайд зөвшөөрөлгүйгээр саравч барьжээ. 

Зөрчлийг арилгуулахаар НХШГ-аас долоодугаар сарын 8-нд газрыг чөлөөлөх тухай хугацаатай мэдэгдэл өгчээ. Уг асуудалтай холбогдуулан нийслэлийн Засаг даргын Эдийн засгийн хөгжил, дэд бүтцийн асуудал хариуцсан нэгдүгээр орлогч Т.Даваадалай болон холбогдох албаныхан тус байршилд ажиллалаа.

Тэрээр  “Хүмүүсийн мэддэгээр Баянгол зочид буудлын хойд талын автобусны буудлын дэргэдэх явган хүний гарц хамгийн ачаалал ихтэй гарцуудын нэг. Гэвч Segafredo Zanetti Espresso нь зөвшөөрөлгүйгээр нийтийн эзэмшлийн зам, талбайд 4-7 метр урт террас барьсан.

Зарим байгууллага үүдэндээ зөвшөөрөлгүйгээр террас барьж, удаах жилээс нь хашлага хийдэг. Цаашлаад өргөтгөл барьж, нийтийн эзэмшлийн талбайг хумин, явган хүн зорчих боломжгүйд хүрдэг. Явган хүний замыг өргөтгөх зорилгоор ногоон байгууламжийн талбайг багасгах тохиолдол гардаг зэрэг дам нөлөөтэй.

Иймээс иргэн, аж ахуйн нэгж байгууллагуудадаа энэ төрлийн зөрчлийг гаргахгүй байхыг уриалж байна. Мөн цаашид зөвшөөрөлгүйгээр нийтийн эдэлбэр газар дээр барилга, байгууламж барьсан зөрчлийг үе шаттай арилгаж, хориглоно” гэв.

Энэ зөрчлийг арилгуулаад зогсохгүй нийтийн эзэмшлийн талбайн нөхөн сэргээлтийг хийлгэх хэрэгтэй. Нийтийн эдэлбэр газар нь олон нийтийн эрх ашгийг хангасан эзэмшил байх ёстой болохоос биш хэн нэгний бизнесээ өргөжүүлэх гэсэн зөвшөөрөлгүй үйлдэл байж болохгүй гэв.

Мөн Сүхбаатар дүүргийн дөрөвдүгээр хороонд, Сөүлийн гудамж дагуу ерөнхий боловсролын 45-р сургуулийн урд талд түр байгууламж барьсан зөрчлийг арилгуулжээ.