Онцгой байдлын байгууллагаас “Сендвич хавтан, тавилга, вакум цонх, бетон зуурмагийн үйлдвэрийн барилга байгууламжид төлөвлөгөөт хяналт шалгалт”-ыг улсын хэмжээнд зохион байгуулав. 291 барилга байгууламжид хяналт шалгалт хийж 1761 зөрчлийг илрүүлснээс 381-ийг газар дээр нь арилгуулсан байна. 

Эрх бүхий албан тушаалтны хууль ёсны шаардлага болон галын аюулгүй байдлыг хангах үүргээ биелүүлээгүй, хууль, норм, дүрэм зөрчсөн дөрвөн иргэн, хуулийн этгээдийн зөрчлийг Зөрчлийн тухай хуулийн дагуу хялбаршуулсан журмаар шийдвэрлэж 6.100.000 төгрөгийн торгууль оногдуулсан.

Мөн нэг иргэн, хуулийн этгээдийн үйл ажиллагааг хэсэгчлэн зогсоож зөрчлийг арилгуулахаар ажиллаж байгааг ОБЕГ-аас мэдээлэв. 

• Галын аюулгүй байдлыг бүрэн хангаж, холбогдох хууль тогтоомж, галын аюулгүй байдлын норм, нормативын баримт бичгийн шаардлагыг сахин биелүүлээгүй,
• Дамжуулагчийн тусгаарлагч нь шалбарч гэмтсэн,
• Тусгаарлах чанараа алдсан шугам, дамжуулагч утсыг ашигласан,
• Цахилгаан гүйдэл бүхий кабель шугам, дамжуулах утасны хамгаалалтгүй үзүүрийг ил орхисон,
• Галын аюулгүй байдлын тухай хууль, норм, стандарт, дүрэм, журмын хэрэгжилтийг хангуулж галын аюулгүй байдлын дүгнэлт гаргуулаагүй,
• Аж ахуй нэгж, байгууллага, барилга байгууламжид гал унтраах анхан шатны багаж хэрэгслийн зайлшгүй байх шаардлага норм MNS 5566:2020 стандартын дагуу гал унтраах анхан шатны багаж хэрэгсэл /галын сарай/ иж бүрдлийн дагуу байрлуулаагүй зэрэг нийтлэг зөрчил илэрчээ.