Нийслэлийн лавлагаа мэдээллийн төвийн 1200, 1234 утсаар өнгөрсөн оны аравдугаар сарын 1-нээс аравдугаар сарын 28 хүртэл нийт 5224 дуудлага хүлээн авчээ.

Эдгээрээс 4719 нь өргөдөл гомдол, санал хүсэлт байсан бол нийт хүсэлт, өргөдөл, гомдлын 94.6 хувийг хувийг бүрэн шийдвэрлэсэн гэнэ.

Иргэдээс ирүүлж байгаа өргөдөл, гомдол, санал хүсэлтийн дийлэнх нь Орон сууц нийтийн аж ахуйн газрын үйл ажиллагаатай холбоотой байгаа бол, мөн нийслэлийн Засаг даргын Тамгын газар болон, хот тохижилттой холбоотой өргөдөл гомдол, санал хүсэлт ч нэлээд хувийг эзэлжээ.

Шийдвэрлэгдээгүй байгаа түгээмэл асуудлууд нь Нийслэлийн мэргэжлийн хяналтын газарт хандсан, барилга байрны чанар, эрүүл ахуйн шаардлага хангаж байгаа эсэхийг шалгуулах тухай асуудал, мөн Газрын албанд газрын гэрчилгээ, зөвшөөрөл гарахгүй удаж байгааг шийдвэрлэх, газрын маргаанд хариу өгөхгүй байна зэрэг асуудал байдаг байна. Нийслэлийн Засаг даргын Тамгын газар шинэ оны өмнөхөн Иргэдийг хүлээн авч, үйлчилгээ үзүүлэх төвийг нээсэн. Энэхүү төвд өнгөрсөн хугацаанд өөрийн биеэр ирж хандсан 191 иргэн байгаа юм байна. Эдгээр иргэдээс 111 иргэний асуудал шийдвэрлэх шатандаа явж байгаа бол таван хүсэлтийг бүрэн шийдвэрлэжээ.

Иргэдийг Хүлээн авах төв”-д биечлэн ирүүлсэн өргөдөл, гомдлын голлох асуудал нь Нийслэлийн Засаг даргатай биечлэн уулзах, ажилд орох, тэтгэлэг болон мөнгөн тусламж хүсэх, төрийн хүнд суртлыг шалгуулах тухай, газар өмчлөх, эзэмших, ашиглах болон газрын маргаан, орон сууц хүссэн болон халтиргаа гулгааг арилгах, хог хаягдлыг цэвэрлэх тухай, баригдсан болон баригдаж байгаа барилгуудын зөвшөөрөлтэй эсэхийг нь шалгуулах тухай, төрийн албан хаагчийн ёс зүй, харилцаа хандлагын талаар, нийтийн тээврийн хэрэгсэл зогсох буудал нэмэх, уртасгасан цагаар явуулах тухай зэрэг асуудлуудаар ханджээ.

М.Тунгалаг