Улсын дээд шүүхийн Эрүүгийн хэргийн танхимын тэргүүн Ч.Хосбаяр, шүүгч Б.Батцэрэн нар Хүний эрхийн үндэсний комиссын  дарга Ж.Хунанг өнөөдөр хүлээн авч уулзжээ.

Тэд НҮБ-ын Дур зоргоор баривчлан саатуулах асуудлаар ажлын хэсгийн дүгнэлттэй холбоотой асуудлаар санал солилцсон байна. ХЭҮК-ын дарга Ж.Хунан НҮБ-ын Дур зоргоор баривчлан саатуулах асуудлаар ажлын хэсэг манай улсад ажиллахдаа 2020-2021 онд баривчлах ажиллагааны 98-99 хувийг шүүхийн зөвшөөрөлгүй хийсэн гэсэн урьдчилсан дүгнэлт гаргасныг дурдаад энэ талаар Улсын дээд шүүхийн Эрүүгийн хэргийн танхимын байр суурийг тодруулжээ.

Танхимын тэргүүн Ч.Хосбаяр хуулийн зохицуулалтын хувьд баривчлах ажиллагаанд урьдчилж хянуулах болон хойшлуулшгүй тохиолдлоор нөхөж зөвшөөрөл авах хоёр зохицуулалт байгаа. Эдгээрээс сүүлчийнхийг нь ихэвчлэн хэрэглэж буйтай холбоотой зөрчил үүсээд байгааг онцолсон байна.

Хуульд хойшлуулшгүй тохиолдолд саатуулах объектив шалгуурыг заасан ч бодит байдалд тэдгээрийг хэрэгжүүлдэггүй, амралтын өмнөх өдөр сэжигтнийг шүүхээс зөвшөөрөл авалгүй саатуулах тохиолдол олон байгааг шүүгч Б.Батцэрэн онцлоод цаашид энэ асуудлыг шийдвэрлэх шаардлагатай гэж үздэгээ хэлэв.

Уулзалтын үеэр хүний эрхийн баталгааг хангахын тулд баривчлан саатуулах ажиллагаанд шүүхийн хяналт оролцоог бүрэн утгаар нь хэрэгжүүлэх, бага насны хүүхэдтэй эхчүүдийг цагдан хорих асуудалд анхаарах, гэмт хэрэгт сэрдэгдсэн хүнээс өөрийнх нь эсрэг гэрчийн мэдүүлэг авахгүй байх зэрэг хүний үндсэн эрхтэй холбоотой олон асуудлаар харилцан ярилцаж, санал бодлоо солилцож, хамтран ажиллахаар тохиролцлоо.