Монгол Улс дахь НҮБ-ын Нийгэмлэг нь НҮБ-ын Эмэгтэйчүүдийн байгууллага, Япон Улсын засгийн газрын дэмжлэгтэйгээр “Empowering Voices” буюу "Эмэгтэйчүүд, энх тайван, аюулгүй байдлын хөтөлбөрийг Монгол Улсад хэрэгжүүлэхэд Иргэний Нийгмийн Байгууллагуудын чадавхыг бэхжүүлэх" төслийг хэрэгжүүллээ.

НҮБ-ын Аюулгүйн зөвлөлийн 1325 дугаар тогтоолоор баталсан Эмэгтэйчүүд, энх тайван, аюулгүй байдал (WPS) хөтөлбөр нь эмэгтэйчүүдийн зөрчил мөргөлдөөний үеийн болон мөргөлдөөний дараах онцгой нөхцөл байдлыг хүлээн зөвшөөрснөөрөө онцлог бөгөөд энх тайвныг бэхжүүлэх, шийдвэр гаргах бүхий л түвшинд эмэгтэйчүүдийн оролцоог бататгасан. Сүүлийн жилүүдэд уур амьсгалын өөрчлөлт, цахим аюулгүй байдлын асуудлууд улс орнуудын аюулгүй байдалд ихээр нөлөөлж байгаа тул эдгээр асуудлыг WPS хөтөлбөрт хамруулдаг болсон нь Монгол зэрэг зэвсэгт мөргөлдөөнгүй улс оронд өндөр ач холбогдолтой юм.

25 жилийн өмнө батлагдсан WPS хөтөлбөрийн тухай иргэний нийгмийн байгууллагын төлөөлөл болон олон нийтийн мэдлэгийг нэмэгдүүлэх, WPS-ийг Монгол Улсад хэрэгжүүлэх Үндэсний Үйл Ажиллагааны Төлөвлөгөөнд олон нийтийн дуу хоолойг хүргэх зорилгоор хэрэгжсэн Empowering Voices хөтөлбөрт энх тайван, тогтвортой хөгжил, жендэрийн тэгш байдлын төлөө үйл ажиллагаа явуулж буй иргэний нийгмийн байгууллагуудын төлөөлөл болон хувь хүн бүхий 80 оролцогч нийслэл, орон нутгаас хамрагдлаа.

2025 оны 9 дүгээр сарын 17-нд эхлэн хоёр сарын турш үргэлжилсэн энэхүү хөтөлбөрийн хүрээнд энх тайван, хүний эрх, цахим аюулгүй байдал, уур амьсгалын өөрчлөлт зэрэг сэдвээр сургалтыг дотоодын болон Канад, Солонгос, Япон зэрэг улсуудын экспертүүд орж, олон улсын туршлагаас хуваалцлаа.

Сурч мэдсэн зүйлсээ олон нийтэд түгээх зорилгоор оролцогчид өөрсдийн орон нутагт сургалт, хэлэлцүүлэг зохион байгуулсан юм. Тэд Сэлэнгэ, Баян-Өлгий, Дархан-Уул, Орхон, Баянхонгор, Архангай, Хөвсгөл аймаг болон Улаанбаатар хотод нийт 1100 гаруй хүнд хүрч, WPS хөтөлбөрийн талаар мэдлэг олгохоос гадна охид, эмэгтэйчүүдийн дуу хоолойг сонсох гүүр болж ажиллалаа.

Empowering Voices хөтөлбөрийн хүрээнд оролцогчдын дунд хэлэлцүүлэг зохион байгуулж, Үндэсний Үйл Ажиллагааны Төлөвлөгөөнд олон нийт, иргэний нийгмийн байгууллагуудын дуу хоолойг тусгах зөвлөмжийг боловсруулж холбогдох байгууллагуудад хүргэн ажиллаж байна.

Төслийн дараагийн чухал үр дүн бол Эмэгтэйчүүд, энх тайван, аюулгүй байдлын төлөөх иргэний нийгмийн байгууллагуудын эвслийг байгуулах санаачилга юм. Эвсэл нь иргэний нийгмийн байгууллагуудыг нэгтгэн, Монгол Улсад WPS хөтөлбөрийг хэрэгжүүлэхэд бодит хувь нэмэр оруулах зорилготой. Эвсэл үүсгэн байгуулагдаж байгааг Empowering Voices хөтөлбөрийн хаалтын арга хэмжээний үеэр зарлалаа.

Оролцогчдын сэтгэгдлийг дараах бичлэгээс үзнэ үү.