УИХ-ын чуулганы хуралдаанаар “Монгол Улсын хөгжлийн 2027 оны төлөвлөгөө батлах тухай” Улсын Их Хурлын тогтоолын төслийг хэлэлцэж буй. Уг асуудалтай холбоотойгоор 203 зарчмын санал гарсан. 

УИХ-ын гишүүд улсын жилийн төлөвлөгөөнд ажлын хэсгийн гишүүд өөрсдийн тойрог, сумын дотуур байрны засвар гэх мэтчилэн "жижиг" зүйлс оруулж ирж байгаад шүүмжлэлтэй хандаж байна. 

Үүнтэй холбогдуулан Ерөнхий сайд Н.Учрал "Төсөв дээр Засгийн газарт орон зай өгөөч. Гишүүдийн өгсөн саналуудаас дэмжсэн байгаа 35 санал нь л гэхэд 1.3 их наяд төгрөг болж байна. 

Энэ бол тэтгэврийг 30 хувиар нэмэх хэмжээний мөнгө. Сум дундын зам, сургууль засвар гээд тавьчихдаг. Сум бүрийн асуудлыг бүгдийг шийдэж чадахгүйгээс хойш улсын жилийн төлөвлөгөөнд тусгаад яах вэ? 

203 саналын төсөв нь 2.9 их наяд төгрөг болно. Хүүхдийн мөнгө л гэхэд 1.7 их наяд. Орон зай байхгүйгээр ирэх оны төсөв дээр тэтгэвэр, цалингаа нэмэх асуудлыг шийдэж чадахгүй, халамж зорилтот бүлэгтээ хүрч чадахгүй. 

Үнийн өсөлт ийм өндөр байгаа энэ үед тэтгэврийг реформ хийе гээд ярьж байна. Шударга тогтолцоо руу шилжүүлнэ. 

2014 оноос өмнө тэтгэвэрт гарсан ахмадууд 1.4 саяас тэтгэвэр тооцуулаад гурван жилийн дараа тэтгэвэрт гарсан хүмүүс 2.4 саяас тооцуулж байна. Ийм ялгаатай байна. 

Тэгээд сүүлийн таван жилд шимтгэл хэн өндөр төлсөн нь өндөр тэтгэвэр тогтоолгоод эхэлсэн. Шударга тэтгэврийн тогтолцоог бүрдүүлэх орон зайг Засгийн газарт өгч, дэмжлэг үзүүлээч гэж гишүүдээс хүсэж байна" гэсэн тайлбарыг өгөв.