Зээлдэгчдийн холбооноос Иргэдийн тэтгэвэр барьцаалсан зээлийн төлбөрийг төрөөс нэг удаа төлөх тухай хуулийн төслийн талаар хэвлэлийн хурал хийж байна.

Тус холбоо 2015 онд байгуулагдсан бөгөөд тэтгэврийн зээлийн хүүг тэглэх асуудлаар өнгөрсөн аравдугаар сард таван банкинд энэ шаардлагаа хүргүүлсэн ч бие даан шийдвэр гаргах боломжгүй гэдгээ илэрхийлсэн байна. Ингээд арваннэгдүгээр сард энэ асуудлаар Монголбанкны Ерөнхийлөгчтэй уулзах хүсэлт тавьсан боловч өнөөдрийг хүртэл уулзаагүй байгааг хэллээ. 

УИХ-аар хэлэлцэж байгаа “Иргэдийн тэтгэвэр барьцаалсан зээлийн төлбөрийг төрөөс нэг удаа төлөх тухай” хуулийн төслөөр зөвхөн зээлтэй иргэдийн зээлийг тэглэх бус зээл аваагүй, авсан зээлээ оноос өмнө төлж дуусгасан гээд бүх ахмадад тэгш хувиарлалт хийх ёстой гэсэн байр суурийг Зээлдэгчдийн холбооноос илэрхийллээ. 

Мөн тэтгэврийн зээлийн хүүг тэглэх асуудлаар Монголбанкны Ерөнхийлөгчид хоёр заалт бүхий шаардлага хүргүүлэхээр болсноо мэдэгдсэн юм. 

Тэд тэтгэврийн зээлийг тэглэх нь тун зөв бөгөөд цаашид тэтгэврийн зээлийн хүүг тэглэж, доод хэмжээг нь өсгөх ёстой гэсэн байр суурийг илэрхийллээ. 

Зээлдэгчдийн холбооны тэргүүн Ц.Солонго "776 тэрбум төгрөгөөр 21 аймагт бүхэл бүтэн хоёр, хоёр сургууль барих мөнгө. Энэ хэмжээний мөнгийг ахмадуудын зээлийг чөлөөлөхөд зарцуулах гэж байна. Тиймээс бүх ахмадуудад тэгш хүртээх ёстой. Цаашид манай холбоо тэтгэврийн зээлийн хүүг буулгах чиглэлээр ажиллана. Тэтгэврийн зээлийг улс төржүүлэхийг зөвшөөрөхгүй" гэсэн юм. 

Зээл авсан иргэдийн эрх ашгийг хамгаалдаг тус байгууллага зээл авсан иргэдийн зарцуулалтын талаар мэдээлэхдээ "Иргэд амьжиргаагаа залгуулах, бизнес эрхлэх, хүүхдүүдийнхээ лизенгийг төлөх гэж зээл авдаг" гэв. 

773 тэрбум төгрөгөөр зээлийг тэтгэврийн зээлийг тэглэхэд зарцуулахаар болсон бөгөөд үүнийг тэтгэвэр авч байгаа иргэддээ тэгш хуваавал 2.5 сая төгрөг өгөх боломжтойг дурдлаа.