УИХ-ын чуулганы нэгдсэн хуралдаанаар Г.Занданшатарыг Ерөнхий сайдаар томилох асуудлыг хэлэлцэж байна. 

УИХ-ын гишүүн Б.Пүрэвдорж, Өнгөрсөн даваа гарагт /2025.06.09/ Хөвсгөл аймгийн Эрдэнэбулган суманд иргэдтэй уулзалт хийсэн. Өндөр настан Оюунбилэг, Даваасүрэн, Түмэнбаяр нар тэтгэврийн зээлийн хэмжээг багасгаж, хугацааг нь богиносгосон шийдвэрээ өөрчлөхийг хүссэн. Энэ асуудлаар Монголбанкны удирдлагатай уулзсан. Ахмадууд намайг дэмждэг. Хэрэв энэ асуудлыг шийдэхгүй бол ахмадуудтай жагсана шүү гэдгээ хэлсэн.

Эрдэнэбулган сум 2024 оны намар самрын хураамжаар 7.4 тэрбум төгрөг олсны 7.3 тэрбумыг аймаг руугаа татаж аваад 250-хан тэрбумыг нь суманд үлдээсэн. Энэ бол Төсвийн тухай хууль болон бусад хуулийг зөрчиж байна. 70 хувийг орон нутагт нь үлдээх ёстой. Та Ерөнхий сайд болбол баялгаас олсон орлогын 70 хувийг тухайн орон нутагт нь үлдээх хуулийн дагуу ажиллах уу?

Дарханы зам хурдны зам боловч хэдхэн км яваад хурд сааруулагчтай. Энэ бол эрх барьж буй намын нүүр царай. Хурд сааруулагч нь төрийн бүх шатанд ажлыг сааруулдаг, та нарын байгаа байдлыг харуулж байгаа юм.
Гэтэл Эрдэнэбулган суманд айл болгон цемент хандивлаад 1км замыг төсвийн хөрөнгө авахгүй шийдсэн байна. Дахин баярынхаа өмнө 1.3 км зам тавихаар иргэдээсээ хандив цуглуулж, сумынхан нэгдээд ажиллаж байна.

Өнгөрсөн жил самрынхаа 300 сая төгрөгийг авч, түүгээрээ ковш, грейдер зэрэг машин , техник авч 17 км замыг өөрсдөө тавьсан байна. Сумын Засаг дарга Эрдэнэнаран, ИТХ-ын дарга Анхбаяр, орлогч дарга Баярбат болон багийн дарга нар бүгдээрээ тэр машинуудынхаа жолооч, оператор хийж, 22 хоногийн турш өөрсдөө ажиллаад замаа тавьж байна. Сэтгэлтэй хүмүүс ингэж ажилладаг юм. Энэ урдуур нэг их эрдэм ном ярьсан, тэгсэн хэр нь хулгай хийдэг хүмүүс сууж байна. 2028 рнд АН ялна. Эрдэнэнараан, ийм сэтгэлтэй хүнийг АН төв рүү татаж ажиллуулна аа.

Г.Занданшатар, Манай гишүүн иргэдийнхээ саналыг сонсоод зогсохгүй, хэрэгжүүлэхийн төлөө ажиллана гэж итгэж байна. Тэтгэврийн зээлийн хугацаа, хэмжээ өөрчлөгдсөн нь ахмадуудын санхүүгийн ачааллыг нэмэгдүүлж байгаа. Зээлтэй холбоотой асуудлыг УИХ-ын харьяа Монголбанк шийдвэрлэнэ. 

Самрын хураамжийг аймаг тэр чигт нь авч байгаа нь баялгийн шударга хуваарилалтыг зөрчиж байна. Хураамжийн тодорхой хувийг сумандаа үлдээдэг байх, тэр байгаль орчноо хамгаалах, ойжуулахад зарцуулагддаг байх нь зүйтэй. Энэ талаар хуулийн төсөл санаачилж, хамтарч ажиллахад бэлэн байна гэв.