Жолоо барихын өмнө согтууруулах ундаа хэрэглэх дуртай хүмүүст тун таагүй сонсогдох нэгэн заалтыг Оросын Засгийн газар батлах гэж байна.

Согтуу жолоочийн машиныг нь хураан авах бөгөөд нэлээд их хэмжээний торгууль төлж эргүүлэн авах боломжтой болно. Сангийн яамнаас ийм заалт бүхий хуулийн төсөл бэлтгэж эхэлсэн талаар “Российская газета” сонин мэдээлэв.

Хураасан машиныг торгуулийн талбайд байршуулж төлж дуусах хүртэл эргүүлэн өгөхгүй. Өнөөдрийн байдлаар согтуугаар жолоо барьсан тохиолдолд 30 мянган рублийн торгууль төлж байгаа билээ. Түүнээс гадна эрхийг нь хасаад зогсохгүй шоронгийн хаалга татах магадлалтай байдаг юм.

Ийм арга хэмжээ жолоочийн хариуцлагыг өндөрсгөнө хэмээн замын цагдаагийнхан үзэж байна. Гэхдээ олон нийтийн хяналт ч чухал үүрэгтэй гэж үзжээ. Согтуугаар жолоо барих явдалтай тэмцэхэд Эрүүл мэндийн яам ч анхаарч байгаа бөгөөд албадан эмчлэхийг санал болгосон аж.  

Энэ оны эхний долоон сарын байдлаар улс орон даяар 96626 зам тээврийн осол бүтгэгдэж 12 мянган хүн амь үрэгджээ. Тэдний 403 нь хүүхэд юм байна.  

Эх сурвалж: “Российская газета”