Нийслэлийн Засаг дарга бөгөөд Улаанбаатар хотын Захирагч С.Батболд Бүгд найрамдах Энэтхэг Улсаас Монгол Улсад суугаа Онц бөгөөд Бүрэн Эрхт Элчин сайд, доктор Сүреш Бабуг хүлээн авч уулзлаа. Уулзалтаар хамтын ажиллагаагаа өргөжүүлэн хөгжүүлэх талаар санал солилцов.

Элчин сайд, доктор Сүреш Бабу “Өнгөрсөн онд манай улсын Ерөнхий сайд Нарендра Моди Улаанбаатар хотод төрийн айлчлал хийж, Энэтхэгт суралцах Монгол оюутны тоог 150-200-д хүргэж, Улаанбаатарт Монгол-Энэтхэгийн хамтарсан сургууль байгуулахаар болсон. Үүний хүрээнд төрийн захиргааны албан хаагчдыг англи хэл, мэдээллийн технологи, санхүү, удирдлагын чиглэлээр сургалтад хамруулах боломжтой” гэлээ.

Мөн тэрээр Улаанбаатар дахь Махатма Гандийн гудамжийг тохижуулах, Энэтхэг Улсад болох соёлын үйл ажиллагаанд уран бүтээлчдээ оролцуулах, хоёр улсын хамтарсан сургуулийн газрын асуудлыг шийдвэрлэж өгөхийг хүслээ.

Хотын захирагч С.Батболд “ Юуны өмнө тантай уулзаж байгаадаа таатай байна. Энэтхэг, Монгол хоёр улс олон жилийн түүх болон шашны найрсаг харилцаатай. Цаашид Улаанбаатар хот, Бүгд найрамдах Энэтхэг Улсын Элчин сайдын яамтай олон салбарт хамтран ажиллаж, харилцаагаа улам өргөжүүлэн хөгжүүлнэ. Таны тавьсан хүсэлтүүдийг таатай хүлээн авч байгаагаа илэрхийлье. АСЕМ-ын уулзалттай холбогдуулж, нийслэлийн олон гудамж, талбайг тохижуулсан. Үүний нэг нь Махатма Гандийн гудамж юм. Энэ гудамжийг дахин ямар байдлаар тохижуулах талаар таны саналыг сонсож, ажил хэрэг болгоно. Энэтхэг, Монголын хамтарсан сургуулийн газрыг судалж, танай улсад болох соёлын үйл ажиллагаанд уран бүтээлчиддээ оролцуулах боломжтой” гэлээ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.