Бурхан багшийн Их дүйчэн өдөр энэ сарын 31-нд тохионо. Монголчууд эртнээс зуны эхэн сарын 15-ныг Бурхан багш эхийн хэвлийд оршсон, төгс гэгээрсэн, нирваан дүр үзүүлсэн гурван их үйл давхацсан билэгт сайн өдөр хэмээн дээдлэн тэмдэглэж ирсэн уламжлалтай.

Энэ өдрийг дэлхийн Бурханы шашинт орнууд өргөн тэмдэглэдэг. Энэрэн нигүүлсэхүй, амар амгалан, буян хишгийг түгээн дэлгэрүүлэх өдөр хэмээн эрхэмлэдэг. НҮБ-аас 1999 онд олон улсын тэмдэглэлт өдөр болгон тунхаглаж, Монгол Улс 2019 онд бүх нийтийн баяр, амралтын өдөр болгон хуульчилсан.

Энэ жилийн Их дүйчэн өдөр Бурхан багшийн хоёр манлай шавь Шаарийбуу, Монголжийбуу нарын ариун ринсрэлийг анх удаа Энэтхэг Улсаас Монгол Улсад залж буйгаараа онцгой ач холбогдолтой.

Энэ талаар мэдээлэл өгөх хэвлэлийн хурал маргааш 11:00 цагт МБШТ–Гандантэгчэнлин хийдийн Батцагаан цогчэн дуган А танхимд болно.   

Ринсрэл гэж юу вэ?

Буддын шашинт лам багш нарын чандрын үнснээс гардаг сувдан хэлбэртэй онцгой сонин зүйл юм. Энэрэнгүй сэтгэл хийгээд билиг ухааны эрдмийг олсноор үүсэн буй болдог гэж үздэг. Сувдан хэлбэртэйгээс гадна шүд, ясны ринсрэлүүд байдаг. Ринсрэлийг харснаар асрал энэрлийн сэтгэл төрдөг учиртай. Энэрэл нигүүлслийг түгээх нь дэлхийн энх тайвны үйлсэд хувь нэмрээ оруулж буй хэрэг юм.

Эх сурвалж: "Билгийн мэлмий" сонины 2009.06 сарын дугаараас