Нобелийн хорооны албан ёсны арга хэмжээ болох Япон Улсын Ёкохама хотод \гуравдугаар сарын 12-15-ны хооронд зохион байгуулагдаж буй “10th Hope meeting” “Нобелийн шагналтан”-уудын уулзалтанд дэлхийн 20 гаруй орны 106 докторант, пост доктор, шилдэг залуу судлаачид оролцож байна.

Уулзалт 2008 оноос хойш 10 дахь удаагаа зохион байгуулагдаж байгаа бөгөөд “Ирээдүйн хүнс” сэдвийн хүрээнд салбар бүрийн нобелийн шагналт Йоханнес Георг Беднорц, Макото Кобаяши, Такааки Кажита, Барри Шарплесс, Ада Ёнат, Жэймс Фрейзер Стоддарт, Тим Хант зэрэг эрдэмтэд илтгэл хэлэлцүүлэхийн зэрэгцээ залуу судлаачдад судалгаа, эрдэм шинжилгээний ажлын нийгмийн хэрэгцээ, үнэ цэнийн талаар санал, зөвлөгөө өгч, хэлэлцүүлэг өрнүүлж байна.

Тус уулзалтад Монгол Улсыг төлөөлж НЭМҮТ-ийн Эрүүл мэндийг дэмжих албаны дарга, АУ-ны доктор О.Нандин-Эрдэнэ, Дарханы Ургамал, газар тариалангийн хүрээлэнгийн Генетик нөөцийн секторын эрхлэгч, ХАА-н доктор Т.Атарсайхан нар оролцож “Монгол Улсын хүн амын гепатитийн вирусын тархалт, нийгмийн эрүүл мэндийн асуудал болох нь”, “Ургамлын генетик нөөц түүний ашиглалт”, сэдэвт илтгэл хэлэлцүүлсэн байна.

Дэлхийн “Нобелийн шагналтан”-уудын арга хэмжээнд уригдсан Монгол залуу эрдэмтдийн хувьд өөрийн оронд тулгамдаж буй асуудлаар илтгэлээ хэлэлцүүлж, дэлхийн шинжлэх ухааны ололт амжилтаас хуваалцсан тухай Монголын Шинжлэх ухаан технологийн сангийн цахим хуудсаар мэдээлжээ.

Тус арга хэмжээнийн нээлтэд Японы гүнж Мако оролцжээ.

Эх сурвалж: NobelPrizeDialogue, Japan society for the Promotion of Science, Шинжлэх ухаан технологийн сан