Өнгөрсөн долоо хоногт Италийн таван иргэн Мальдивт усанд шумбаж байгаад осолдож, амиа алдсан талаар мэдээлсэн. 

Таван хүний нэгийнх нь цогцсыг ослын дараахан олсон. Үлдсэн дөрвөн хүний цогцсыг хайж байсан бөгөөд олдсон гэдгийг Мальдивын засгийн газраас мэдээллээ. 

Эрлийн багийнхан тэдний цогцсыг Вааву атоллын 60 метрийн гүн дэх агуйгаас олсон байна. Эрлийн үеэр аврах багийн гишүүн мөн амиа алдсан юм. 

Энэ нь шүрэн арлын аялал жуулчлалаар алдартай Мальдивт шумбалтын үеэр болсон хамгийн том ослуудын нэгт тооцогдож болзошгүй байна. 

Амиа алдсан шумбагч нарын дунд Женоагийн их сургуулийн профессор, судлаач нар байсан бөгөөд тэд уур амьсгалын өөрчлөлт биологийн олон янз байдалд хэрхэн нөлөөлж буйг судлахаар очсон байжээ. 
Тэд өнгөрсөн долоо хоногийн пүрэв гарагт шумбалтаа эхлүүлсэн ч эргэж гарч ирээгүй тул тэднийг сураггүй болсонд тооцсон аж.

Тухайн үед цаг агаар таагүй байсан бөгөөд зорчигч тээврийн завь болон загасчдад шар түвшний анхааруулга гаргаад байв. 

Шумбагчид гүн шумбалт хийх зөвшөөрөлтэй байсан ч агуй руу очих талаар хүсэлтдээ дурдаагүй гэв. 

Осол болсны дараа Женоагийн их сургуулиас мэдэгдэл гаргаж, уг шумбалт албан ёсны судалгааны ажлын хэсэг бус сайн дурын үйл ажиллагаа байсан гэдгийг мэдэгджээ.

Эх сурвалж: ВВС