ПАРИС. /ИТАР-ТАСС/. Нобелийн Энхтайвны дараагийн шагналыг Пакистаны 15 настай, хүний эрхийн төлөө тэмцэгч Малала Юсуфзай охинд олгохыг хүссэн захидлыг Францын парламентын 150 гаруй гишүүн Норвегийн Нобелийн хороонд илгээжээ. Энэ тухай Францын хэвлэл мэдээллийн хэрэгслүүд мэдээлсэн байна.

"Улс төрийн бүх бүлэглэлийг төлөөлөгч депутатууд дээрх хүсэлтэд гарын үсэг зурсан. Осло хотноо Европын Холбоонд Нобелийн Энхтайвны шагнал гардуулах ёслолын ажиллагаанд оролцсон Францын Ерөнхийлөгч Франсуа Олланд парламентын гишүүдийн энэ санаачилгыг дэмжинэ гэдэгт найдаж байна" гэж сөрөг хүчний гол нам болох Ардын хөдөлгөөнийг дэмжих холбооноос сенатын гишүүнээр сонгогдсон Жоэль Гаррио-Мэйл хэлжээ.

Малала Юсуфзай охин 11 настайгаасаа интернэтэд блог хөтөлж эхэлсэн байна. Тэрбээр "Талибан" хөдөлгөөний босогчид 2007-2009 оны хооронд Сват хөндийг хяналтдаа авсан байхдаа хүний амийг хэрхэн хөнөөж, цаазалж байсан тухай бичдэг байжээ. Охин 2011 онд энх тайван байдал тогтооход чухал хувь нэмэр оруулсныхаа төлөө Олон улсын хүүхдийн шагналд нэр дэвшсэн байна.

Гэвч талибуудын үйлдсэн гэмт хэргүүдийг зоригтойгоор илчилж, Пакистаны хүүхдүүдийн эрхийн төлөөх тэмцэл нь аминд нь хүрэх шахсан. Өнгөрөгч аравдугаар сарын эхээр террористууд Малала охиныг хөнөөхийг оролдож, түүний сууж явсан сургуулийн автобус руу гал нээсэн юм. Халдлагын хариуцлагыг "Техрик-и-талибан Пакистан" бүлэглэл хүлээсэн байна.

Малала толгой, хүзүүндээ шархадсан бөгөөд одоо Их Британид эмчлүүлж байна. Түүний эмчилгээний зардлыг Пакистаны эрх баригчид гаргаж байгаа ажээ.

Д.Жаргал