“Uncage Mongolia” клуб, Баянзүрх дүүргийн 14-р хороо хамтран “Өнгө нэмье” төслийн хүрээнд ХӨСҮТ-ийн цагаан саарал, цулгуй ханыг өнгө будгаар чимж, гүн утга бүхий олон төрлийн зургийг амилуулжээ. 

Тэд 30 ширхэг блокон хашааг зурж чимэглэх ажлаа долоо хоногийн өмнө эхлүүлсэн байна. Ханыг өнгө будгаар чимэх ажилд “Анима” дүрслэх урлагийн коллежоос 14, “Uncage Mongolia” клубээс нийт 130 гаруй залуу оролцсон байна.

Эхний таван ханан дээр эмчийн тухай зурахаар тооцож, зургаа дахь ханан дээр түргэний тэрэг зурах санааг жолоочид дэвшүүлсэн тул “ямар ч хүнд хэцүү үед түргэний тэрэг бартаат замыг туулаад ирдэг” гэсэн санааг зургаараа илэрхийлэхийг хүссэн байна. Түүнчлэн эмч нар хүнд хэцүү нөхцөлд халдварт өвчинтэй тэмцэн ажилладаг, биднийг хамгаалдаг гэдэг санааг харуулахыг зорьсноо ч тэд хэлж байв.

Дараагийн ханануудад хүүхдүүдийг дүрсэлжээ. “Энэ хавиар зөрж өнгөрч буй хүмүүст бага ч болов сэтгэлийн дэм өгөхийн тулд гэгээлэг зургуудыг зурсан” гэдгийг “Uncage Mongolia” клубийн тэргүүн З.Сумъяабазар онцоллоо.

Харин гурав дахь хэсгийн зургуудад тод өнгө давамгайлжээ. Өчигдөр, уржигдрын аадар борооноос үүдэн лак түрхэж амжаагүй байсан зургууд бага зэрэг урссан ч тэд одоо сэргээн будаж байгаа аж. 

Хананыхаа зургуудыг хооронд нь тусгаарлахын тулд баганууд дээр цэцэг түлхүү зурсан байна. 

“Uncage Mongolia” клубийн тэргүүн, МУИС-ийн гуравдугаар түвшний оюутан З.Сумъяабазар “Өглөө есөөс орой есөн цагийн турш 40 залуу ажиллаж эдгээр бүтээлийг зурсан. Бидний хийж байгаа ажлыг мэдээнээс үзээд ус ундаа бариад ирэх хүмүүс байна. Замд явж байгаа хүмүүс ч “та нар гоё шүү” хэмээн биднийг дэмжин эергээр хүлээн авч байгаад баяртай байна” гэв.

Баянзүрх дүүргийн оршин суугч Б.Наранбилэг “Өдөр бүр үүгээр алхахдаа энэ ханыг хардаг юм. Өмнө нь ямар ч зураг будаггүй, согтуу хүмүүс ханыг нь дэрлээд унтдаг байсан эвгүй газар одоо их гоё, гэгээлэг болчихсон байна” хэмээн сэтгэгдлээ илэрхийлэв.

Залуусын нийгмийн оролцоо, манлайлах чадвар, мэдлэг боловсролыг дэмжих зорилгоор үүсгэн байгуулагдсан “Uncage Mongolia” клуб 2020 оны есдүгээр сарын 5-наас үйл ажиллагаагаа явуулж эхэлжээ. Одоогоор клуб 140 гаруй гишүүнтэй бөгөөд тэд амралтын өдөр ч ажилладаг аж. Тэд хамгийн сүүлд “Гудамжны номын сан” төслийг хэрэгжүүлжээ. Төслийн талаарх сурвалжилгыг энд дарж уншаарай.

Түүнчлэн “Uncage Mongolia”-д нэгдэхийг хүсвэл тэдний фейсбүүк хуудас руу хүсэлтээ илгээх боломжтой юм байна.

Л.Ундрах