Хүүхдийн эрх, хүүхэд хамгаалал, Өрхийн амьжиргааг сайжруулах, Гамшгийн эрсдэлийг бууруулах чиглэлээр хөгжил нөлөөлөл, хүмүүнлэгийн үйл ажиллагаа явуулдаг Дэлхийн зөн Монгол  олон улсын байгууллага нь үндэсний шилдэг контент “Маамуу” цуврал анимэйшнийг бүтээгч “Монгол Контент” ХХК-тай (COVID-19) халдварт өвчнөөс хамгаалах цуврал, цогц контент бүтээхэд хамтран ажиллахаар боллоо. 

Нийт 600 сая төгрөгөөр хэмжигдэхүйц нийгмийн хариуцлагын төслийг хэрэгжүүлэх бөгөөд өнөөдөр талууд хамтран ажиллах санамж бичиг байгуулан, хоёр байгууллагын удирдлагууд гарын үсэг зурлаа. 

Төслийн хүрээнд “Аврагч мазаалай”-н богино анимэйшн видеонууд, комик ном, тоглоом, дуу клип, аппликейшн болон вэб хуудасны хөгжүүлэлт зэргийг бэлтгэн хүргэх болно. Манай оронд л цөөн тоотой үлдсэн “Мазаалай”-гаар төлөөлүүлэн хүүхдүүдэд (COVID-19)-ийн халдвараас хэрхэн өөрсдийгөө хамгаалах, гараа яаж зөв угаах, амны хаалтны зөв хэрэглээ зэргийг заах юм. Дэлхийн зөн Монгол  олон улсын байгууллага мазаалайг дүр болгон сонгож, "Аврагч мазаалай"-н зөвлөмжүүдийг хүүхэд багачууддаа хүргэдэг. Гал түймэр, газар хөдлөлтөөс хэрхэн өөрсдийгөө хамгаалахыг заадаг "Аврагч мазаалай" тун удахгүй шинэ зөвлөгөөнүүдээ хүргэх боллоо.

Энэ оны нэгдүгээр сараас хойш үргэлжилж буй (COVID-19)-ийн эрсдэлийн талаарх мэдээ мэдээллийг ЭМЯ болон холбогдох байгууллагууд шуурхай түгээсээр байна. Харин хүүхдүүдэд зориулж тусгайлан бэлтгэсэн контентуудыг хараахан бүтээгээгүй. Иймд бага насны хүүхдүүдэд зориулсан цуврал контентуудыг бэлтгэн, өдөр тутмын мэдээ мэдээллийн тэргүүлэгч сайт болох gogo.mn, бага насны хүүхэдтэй гэр бүлд зориулсан maamuu.mn болон өсвөр үе, залуучуудын хамгийн их ханддаг yolo.mn сайтуудаар тус тус түгээнэ.

Дэлхийн Зөн Монгол олон улсын байгууллагын Үйл ажиллагааны захирал Г.Энхзул:
Дэлхийн зөн Монгол Олон улсын байгууллага нь гурван үндсэн чиглэлийн хүрээнд үйл ажиллагаагаа явуулдгийн нэг нь хүмүүнлэгийн яаралтай тусламж хүргэх, урьдчилан сэргийлэх үйл ажиллагаа зохион байгуулах, хариу арга хэмжээ авах байдаг. Манай байгууллага хүүхэд төвтэй үйл ажиллагаа явуулдаг учраас гамшиг ослын үед өөрийгөө хэрхэн хамгаалах, ямар хариу үйлдэл үзүүлэх талаарх мэдээллийг хүүхдэд тохирсон байдлаар хүргэхэд илүүтэй анхаардаг.

Говийн баавгай болох Мазаалай нь дэлхийн дулаарал болон уур амьсгалын өөрчлөлтийн улмаас нэн ховордсон амьтны тоонд тооцогдох болсон учраас түүнийг хамгаалах сэдлийг түгээх үүднээс бид хүүхдэд чиглэсэн гамшгийн эрсдэлийг бууруулах сургалт нөлөөллийн үйл ажиллагаандаа Мазаалайн дүрийг ашиглан “Аврагч Мазаалай” нэртэй олон төрлийн цувралуудыг гарган олон нийтэд хүргэдэг.

“Аврагч мазаалай” контентийг 2014 оноос эхлэн “Монгол Контент" ХХК-тай хамтран хөгжүүлж ирсэн бөгөөд энэ нь хүүхэд багачуудыг аливаа эрсдэлээс урьдчилан сэргийлэх, өөрийгөө хамгаалах арга ухаанд сургах зорилготой. Энэ удаад “Аврагч мазаалай” маань хүүхэд багачуудыг коронавируст (COVID-19)-ийн  халдварын тархалтаас урьдчилан сэргийлэх арга хэмжээнд уриалах, өөрийгөө хамгаалах аргад сургахад чиглэгдэн цуврал байдлаар хүргэгдэхээр бэлтгэгдэж байна.

Улс орон даяар өндөржүүлсэн бэлэн байдал зарлаж, хүүхэд өсвөр үеийнхэн маань бүгд гэртээ байгаа энэ цаг үед хэвлэл мэдээллийн байгууллагууд, контент үйлдвэрлэгч нар болон сэтгүүл зүйн салбарынхандаа “ХҮҮХЭД БҮРИЙН САЙН САЙХНЫ ТӨЛӨӨ” хүүхдэд ээлтэй мэдээ мэдээллийг бэлтгэн гаргахыг уриалж байна.

Хүүхэд бүрийн сайн сайхны төлөө гар сунган хүүхдэд ээлтэй сэтгүүлзүйг хөгжүүлэхэд бодит хувь нэмэр оруулан хамтран ажиллахаар болсон "Монгол Контент" ХХК-ын хамт олонд Монгол улсын өнцөг булан бүрт байгаа хүүхэд нэг бүрийн өмнөөс талархал илэрхийлье.

“Монгол Контент” ХХК-ийн Гүйцэтгэх захирал Ц.Ганзориг:
Бид “Дэлхийн Зөн” олон улсын байгууллагатай хамтраад (COVID-19) халдварт өвчнөөс хэрхэн сэргийлэх талаарх контентуудыг хүүхэд багачуудад хүргэнэ. Энэ хүрээнд маскаа зүүх, гараа хэрхэн угаах, өвчнөөс өөрийгөө хэрхэн хамгаалах талаарх зөвлөмжүүдийг хүүхдэд ойлгомжтой байдлаар хүргэх видео, ном, тоглоом, дуу, клип гээд нийт 20 төрлийн контентийг бэлтгэнэ. Мөн эдгээрийг нэгтгэсэн гар утасны аппликэйшн, вэб хуудас хийхээр төлөвлөж байна. Энэ нь (COVID-19)-ийн эсрэг контент ч гэлээ ирээдүйд хүүхдүүдэд хэрэгтэй бүтээл болж үлдэх юм. Учир нь хүүхдэд ойлгомжтой байдлаар хүргэсэн контент буюу эрүүл мэндээ хэрхэн хамгаалах талаарх мэдээлэл манайд төдийлөн байдаггүй.

“Гараа угаа, маскаа зүү, гэрээсээ гарч болохгүй” гээд байгаа ч цаад шалтгааныг нь хүүхдэд ойлгомжтой байдлаар хүргэх хэрэгтэй юм. Төрийн байгууллагууд урьдчилан сэргийлэх мэдээллийг томчуудад зориулан хүргэж байгаа ч хүүхэд багачуудад төдийлөн хүрэхгүй байна. Тиймээс энэ талаарх мэдээллийг хүүхдэд нийцэх байдлаар хүргэх ажлыг “Дэлхийн Зөн” олон улсын байгууллага санаачлан бид хамтран ажиллана.

“Монгол Контент” ХХК нь "“Маамуу” цуврал анимэйшнийг бүтээхээс гадна комик, видео контент бүтээх баг, маркетинг креатив баг, зураачид, сэтгүүлчид, апп, вэб хөгжүүлэгч инженерүүд гээд уг ажлыг гүйцэтгэх цогц багийг бүрдүүлсэн хамт олон. Нөгөөтэйгүүр “Монгол Контент” ХХК-д хариуцлагатай байдал, ёс зүй, олон улсын стандартыг хангахуйц байдал, хүний нөөц, туршлага гээд давуу тал байдаг учраас олон улсын байгууллагуудын төрөл бүрийн төслийг хэрэгжүүлсээр байна.  

Дэлхийн зөн Монгол ОУБ-ын тухай:

Дэлхийн зөн Монгол Олон улсын Байгууллага нь Монгол улсад суурин төлөөлөгчийн газраа нээж ажилласнаас эхлэн 25 жилийн турш түншлэлийн хүрээнд өөрийн урт болон богино хугацааны хөгжлийн төсөл, хөтөлбөрүүдээрээ дамжуулан хүүхэд бүрийн бүрэн дүүрэн, сайн сайхан амьдралын төлөө үйл ажиллагаагаа явуулж буй олон улсын хүмүүнлэгийн байгууллага билээ.

“Монгол контент” ХХК-ийн тухай:
Олон улсын байгууллагуудтай хамтран нийгмийн олон төсөл хэрэгжүүлсэн туршлагатай бөгөөд сүүлийн жилүүдийн ажлуудаас дурдвал:

• “Бизнес эрхлэгч эмэгтэйчүүдийн төв” төслийн үйл ажиллагааг gogo.mn сайтын “Гарааны бизнес” булангаар дамжуулан сурталчлах кампанит ажлыг 2017 оноос хойш одоог хүртэл “Азийн сан”-тай хамтран хэрэгжүүлж байна.
• “Хүчирхийллийг үл тэвчье” медиа кампанит ажлыг “НҮБ-ын Хүн амын сан”-тай хамтран 2018-2019 онуудад хэрэгжүүлсэн.
• “Зам тээврийн ослыг бууруулах” медиа кампанит ажлыг “Жайка” олон улсын байгууллагатай 2019 онд хамтран хэрэгжүүлсэн байна.