Улсын онцгой комиссын шийдвэрийн дагуу БНЧУ-ын Прага хот руу хийх тусгай үүргийг онгоц өнөөдөр 11:35 цагт Буянт-Ухаа олон улсын нисэх буудлаас хөөрлөө. Тус нислэгээр Чехийн аж ахуйн нэгж байгууллагад ажилладаг 80 хүн бүртгүүлэн тус улсыг зорьжээ.  

Чех Улсын Засгийн газар, Олон улсын шилжилт хөдөлгөөний байгууллагын Прага дахь салбарын дэмжлэгтэйгээр хийгдэж буй тус нислэгээр БНЧУ болон зүүн Европын орнуудаас 250 гаруй иргэн эх орондоо ирнэ. Тусгай үүргийн онгоц 08 дугаар сарын 11-ний өглөө 05:30 цагт Улаанбаатарт газардах хуваарьтай.

Тус онгоцоор ирсэн иргэдийг “Наранбулаг”, “Майсон”, “Холидей инн”, “Хавана” зочид буудлууд, “Багабаян” энхийн төлөө цогцолбор, “Синдүра-Мед” эмнэлэгт тусгаарлах юм.

“Майсон”, “Холидей инн”, “Хавана” зочид буудлууд болон “Синдүра-Мед” эмнэлэг нь анх удаа тусгаарлах байрны зориулалтаар иргэдийг хүлээн авах гэж байгаа бөгөөд тус бүр 20-30 өрөөтэй, 35-47 хүн хүлээн авах хүчин чадалтай газрууд юм гэж УОК-ын Шуурхай штабаас мэдээллээ.

Улсын онцгой комиссын шийдвэрээр наймдугаар сард 14 удаагийн тусгай нислэг үйлдэн 3500 орчим иргэнээ татан авна. Энэ дагуу 8 дугаар сарын 09-нд Франкфурт-Улаанбаатар чиглэлийн тусгай үүргийн онгоцоор 260 иргэнийг татан авах ажиллагааг зохион байгуулсан.

Энэ сард:

• 8 дугаар сарын 10-нд Прага-Улаанбаатар
• 8 дугаар сарын 14-нд Сөүл-Улаанбаатар
• 8 дугаар сарын 15-нд Сөүл -Улаанбаатар/транзит
• 8 дугаар сарын 20-нд Истанбул-Улаанбаатар
• 8 дугаар сарын 21-нд Франкфурт-Улаанбаатар
• 8 дугаар сарын 22-нд Сөүл-Улаанбаатар
• 8 дугаар сарын 24-нд Токио-Улаанбаатар
• 8 дугаар сарын 26-нд Франкфурт-Улаанбаатар
• 8 дугаар сарын 27-нд Сидней-Улаанбаатар чиглэлд тусгай нислэг үйлдэнэ.