Лхагва гараг бүр Засгийн газрын ээлжит хуралдаан болдог. Өглөө 08.00 цагт эхэлсэн хурлаар өчигдөр орой болсон баривчилгааг хаалттай хэлэлцэж байна.           

Өчигдөр орой 700 орчим хятад иргэнийг өөр өөр зочид буудлаас баривчилж, их хэмжээний гар утас, компьтерийг нь хураасан юм. Энэ хэрэг прокурорын хяналтад байгаа бөгөөд эдгээр иргэдийг цахим гэмт хэрэг үйлдсэн байж болзошгүй гэж үзэж байгаа юм.      

Өнгөрсөн бямба гарагт Баянгол дүүргийн 19 дүгээр хороо буюу Парадоксын автобусны буудал орчмоос 21 хятад иргэнийг хамгийн түрүүнд баривчилжээ. Тэд жуулчны визээр манай улсад ирцгээсэн, дийлэнх нь компьютерийн өндөр мэдлэгтэй залуучууд байсан байна. Хамгийн сүүлийн үеийн, өндөр үнэтэй компьютер, гар утастай байсан бөгөөд Монголд сүлжээний бизнес хийх судалгаа хийж байна гэж мэдүүлжээ. Сэжиг бүхий энэ хэргийг Баянгол дүүргийн цагдаагийн газраас ТЕГ-т мэдэгдэн,  нийслэлийн хэд хэдэн дүүрэгт шалгалт явуулсан байна.

Баривчлагдсан хятад иргэд зочид буудал гэх мэт томоохон обьектийг бүхэлд нь түрээсэлж, доод давхруудад нь ажлаа хийн, дээд давхарт нь байрлаж байжээ. Мөн тэднийг гадагшаа чөлөөтэй гарахыг нь ажил олгогчид нь хориглодог гэсэн байна. 

30 хоногийн жуулчин ангиллын визийг БНХАУ-ын Хөх хот болон Эрээний консулаас авдаг. Гадаадын иргэн харьяатын газар 30 хоногийн виз олгодоггүй тул бүртгэдэггүй аж.