Шинэ төрлийн коронавиурсийн халдвараар нас барагсдын тоо өчигдөр /2020.01.27/ 81 байсан бол өнөөдөр 106 болж нэмэгдсэн тухай Хятадын эрх баригчид мэдээллээ. Эх газрын Хятадад халдвар авсан хүмүүсийн тоо 4,000 даваад байна. Энэ нь нэг хоногийн дотор 1,300-аар нэмэгдсэн үзүүлэлт юм. 

Халдварын тохиолдол Канад, Шри-Ланка, Герман улсуудад нэмж бүртгэгдсэн бөгөөд нийт 16 улсын 60 орчим иргэн уг вирусаар өвчилсөн нь тогтоогджээ.

Өвчний тархалтыг хязгаарлах зорилгоор Хятадад сар шинийн баярын амралтыг нэгдүгээр сарын 30-нд дуусах байсныг хоёрдугаар сарын 2-ны өдөр болгож сунгав. Одоогоор Хятадын 15 хотод хэсэгчлэн болон бүрэн хорио цээр тогтоогоод байна. Тухайлбал, Шанхайд хоёрдугаар сарын 10-ныг хүртэл эмийн сан, супермаркет, эрүүл мэндийн байгууллагуудаас бусад бүх төрлийн бизнесийн үйл ажиллагааг түр зогсоожээ.

Хүбэй мужид хөл хорио тогтоохоос өмнө 5000 орчим хүн халдварын голомт болох Ухань хотоос гарсан байна. Өвчин нууц үедээ /7-14 хоног/ буюу ямар нэгэн шинж тэмдэг илрээгүй байхдаа хүмүүст халдварлаж байгааг Хятадын эрх баригчид анхааруулж байна.

Дэлхийн эрүүл мэндийн байгууллагын мэдээлснээр одоогоор:

• Тайландад 8
• АНУ, Австрали, Сингапурт тус бүр 5
• Тайван, Малайз, Өмнөд Солонгост тус бүр 4
• Францад 3, Японд 3
• Вьетнамд 2
• Непал, Канад, Камбож, Шри-Ланка, Герман улсад тус бүр 1 тохиолдол бүртгэгдээд байна.

Эх сурвалж. BBC, NHK