УИХ-ын гишүүн Дашзэвэгийн Зоригт Эрчим хүчний сайдаар томилогдлоо. Өвөрхангай аймгаас УИХ-д хоёр дахь удаагаа сонгогдсон тэрбээр эдийн засагч мэргэжилтэй. 2012 оны УИХ-ын сонгуулиар хэл амтайхан гарч, 2013 онд УИХ-ын гишүүний бүрэн эрх нь баталгаажсан.

Ардчилсан намын тулхтай гишүүдийн нэг тэрбээр сайдын албан тушаалд анх удаа сонгогдож буй юм.Хамгийн сүүлд гэргийнхээ эзэмшлийн зочид буудалд улс төр, бизнесийн хүрээний хэдэн эрхэмтэй мөрийтэй тоглож байгаад хууль хяналтынханд баригдсан гэх. Уг хэргийг Баянгол дүүргийн Цагдаагийн хэлтэст шалгаж буй гэсэн мэдээлэл бий ч тэрбээр энэ талаар ам ангайгаагүй билээ.

70 тэрбум төгрөгийн алдагдалтай яваа эрчим хүчний салбарыг хүнд байдлаас гаргах цорын ганц арга зам нь үнийг чөлөөлөх хэмээн УИХ-ын гишүүн Г.Тлейхан, Г.Батхүү нар түүнийг сайдаар томилогдох үед сануулж байсан боловч аль ч Засгийн үед үүнийг хийж зүрхлээгүй.

Үеийн үед алдагдал хүлээж төсвийн нуруун дээр хүнд дарамт болон буудаг эрчим хүчний салбарт ямар менежмент хийх нь Д.Зоригт сайдын санаа тавих асуудал боллоо.